رحلتي الرمضانية المصورة لاندونيسيا (أكثر من 180 صورة)

رحلتي المصورة لاندونيسيا في بداية رمضان 1428هـ (جاكرتا – بالي – بونشاك)

قبل كل شي أحب أن أنوه (ما ادري من وين طلعت انوه) ان هذي أول رحلة لي للعمة وسأسرد لكم حكاية رحلتي القصيرة جدا جدا فربما يستفيد البعض من تجربتي المتواضعة وأحب أن أقدم شكري وامتناني الجزيل لكل من خط حرفا في هذا المنتدى الرائع لأني بالفعل استفدت من نصائح وتجارب المشاركين فيه وأتمنى ان يستفيد غيري من موضوعي ولو بشق تمره … قصدي ولو بكلمة.

رحلتي بدأت من مطار البحرين على خطوط الإمارات وسعر التذكرة 2175 ريال مع العلم ان أفضل سعر كان على الخطوط السعودية 1900 ريال لكني ما لقيت حجز للعودة واللي يبي يسألني عن طيران الاتحاد أقول له سعر التذكرة كان 2050 وأيضا ما لقيت حجز في التاريخ اللي أبيه وكان انسب شي طيران الإمارات والرحلة فيها انتظار في مطار دبي 3 ساعات.

عدد أفراد طاقم الرحلة اثنين ( أنا الملاح وصاحبي القبطان) ومدة الإقامة المتفق عليها أسبوع واحد من السبت إلى السبت يعني أوصل جاكرتا يوم السبت الساعة 8:30 مساء واطلع من جاكرتا السبت اللي بعده الساعة 10:10 ليلا وبكذا أكون أكملت أسبوع كامل. ولا انصح أحد يروح أسبوع لأنه بيتحسر وبحس نفسه كأنه في حلم جميل وانتهى ولا يبقى من الحلم إلا بقايا لذة عالقة في الذهن ومجموعة صور عشان يلزقهم في المنتدى.

طبعا ما حملت معي أي شي من أدوات الطبخ لأني بقعد أسبوع و مو ناقص طباخ وما حملت معي من أغراض غير شوي ملابس وجوازي وألف دولار كاش وألفين ريال كاش وبطاقة فيزا وسبان وماستركارد وتوكلنا على الله.

أولا جاكرتا:
الوصول الساعة 8:30 مساء يوم السبت وأول ما خلصت الجوازات رحنا نصرف من المطار وكان سعر الصرف:
الريـــال = 2300 روبية
الـدولار = 9200 روبية
وهنا لي وقفه مع الصرف لأني اكتشفت بعدين إن أفضل طريقة للصرف انك ما تصرف من أساسه، وبدل الصرف اسحب من حسابك عن طريق جهاز الصراف (ATM) وطبعا اكتشفت هالطريقة بالصدفة لأنه عندي حساب في البنك البريطاني (SABB) وإذا سحبت من حسابي أي مبلغ تجيني رسالة تبليغ على الجوال وبالفعل احتجت الى مبلغ ورحت سحبت مليونين من الصراف وجت لي رسالة على جوالي بالمبلغ اللي نخصم من حسابي بالريال السعودي وبعد الضرب والجمع والطرح لقيت ان الصرف طلع علي مع العمولة اللي أخذها البنك :
الريال = 2484 روبية
والله فله .. يعني بلاش تصرف دولار وتحمل كاش وتعرض نفسك للمخاطر. خلي فلوسك في البنك و كل ما تحتاج مبلغ اسحب من الصراف.

** ملاحظة: إذا سحبت مبلغ اقل من المليونين بيختلف معاك الصرف شئ بسيط لان عمولة البنك على السحب الدولي ثابتة والمبلغ اللي تسحبه كل ما زاد كان سعر الصرف أفضل لك وكل ما قل المبلغ اللي تسحبه من الصراف كان سعر الصرف أقل لكن تقدر تعتمد المليونين في كل سحبه أو أكثر عشان تحصل على سعر جيد.

بعد ما استلمنا الملايين وصرنا في مصاف الأثرياء رحنا على مكتب كاها اللي في المطار (ويا مسافرين خذوها مني لا تروحوا غير كاها لأنه بالفعل أفضل طريقة لحجز السكن بأقل الأسعار) ويوم جيت عنده نسيت وش أفضل الفنادق اللي ذكروها الشباب في المنتدى وأنا كنت مسجلها في أوراق وما ادري وينها المهم قلت له وين أحسن فندق من ناحية الموقع والسعر والخدمة ونصحني باثنين وقال إنهم نفس المستوى ونفس السعر تقريبا (فندق أستون اتيريوم و فندق لي قرانديور) و اثنينهم أربع نجوم والله توكلت على الله وحجزت ثلاث ليالي في لي قرانديور وكان سعر الغرفة بسرير مزدوج 520 ألف مع الإفطار. طبعا أخذنا غرفتين متجاورتين.

فندق لي قرانديور لازم أوقف عنده وأتكلم عنه شوي لأنه يستحق المديح من جميع النواحي وعلى رأسها:
• قربه من مجموعة أسواق وارتباطه بهم بشكل مباشر عن طريق جسور مغلقه ممتدة تشكل شبكة مواصلات داخلية ورائعة.
• خدمة رائعة وتوجد به جميع الخدمات مثل نادي رياضي متكامل، انترنت، مساج 24 ساعة، كافيه وبار في اللوبي 24 ساعة، ميني كوفي بار في الغرفة (غلاية + أكواب + سكر وشاي وكوفي مغلف)، ميني بار (ثلاجة تحتوي على مشروبات غازية وبيرة وعصيرات ومكسرات وشوكولاته واندومي)، قنوات عالمية متعددة وفيها 3 قنوات أفلام عالمية.
• سيفتي بوكس داخل الغرفة.
• كرمكم الله الحمام فيه خرطوش ماء للطهارة وجميع مستلزمات الحمام تجدها جاهزة حتى فرشاة الأسنان والمعجون وموس حلاقة مع المعجون ومجفف الشعر.
• الهدوء والرتابة داخل الفندق وفخامة اللوبي ونظافة الغرفة.

البعض مستغرب من النقاط اللي ذكرتها لكنها تشكل فارق كبير بالنسبة لي وعشان تشعر بالفرق فندق لي قرانديور 4 نجوم وفندق سهيد جايا 5 نجوم لكنه لا يمتلك صفه واحده من المواصفات اللي ذكرتها غير النادي الرياضي والانترنت وبس وأنا سكنت فيه ليلة سأذكرها لاحقا.
وهذا موقع الفندق على النت:

فندق لي قرانديور
http://www.legrandeurhotels.com/jakarta/home.php

وهذي صورة توضح المنظر من غرفتي

وهذي صورة توضح الجسور اللي تربط الفندق مع مراكز التسوق القريبة:

واللي يبي يشوف الصورة السابقة بشكل اوضح ينزلها بحجمها الطبيعي عشان يتمكن من قراءة التفاصيل (أضغط هنا)

وهذي صورة مجمع WTC

وهنا قدام المجمع وما ادري اذا كانت مواقف دبابات والا للبيع

بعد الوصول للفندق غطيت في نوم عميق وراحت الليلة الأولى في جاكرتا ويوم ثاني راح نصه وصاحبي نايم أترجاه يصحى من نومه لين قريب المغرب وبعدها طلعنا نستكشف مراكز التسوق اللي حوالينا وأول شي خطر في بالي اني اشتري شريحة جوال وبالفعل اشتريت شريحة من شركة سمباتي وكانت جيدة فترة استخدامي لها ولكني بعدها اكتشفت اني ما احتاج اشتري شريحه وخلوني اخبركم بهذا الاكتشاف.
ياحبايبي أول ماتوصل لجاكرتا تقدر تشغل جوالك السعودي واعمل بحث عن الشبكات واختار شبكة (XL) وأول ما تشغل شريحتك السعودية على هالشبكة بيرسلوا لك مسج فيه رقمك الاندونيسي المؤقت ويبتدي بـ 081 والغرض من الرقم هذا انك تستخدمه محليا في استقبال مكالماتك المحلية وتحسب المكالمة على المتصل اليك (بسعر المكالمة المحليه) وفي نفس الوقت يبقى جوالك السعودي شغال. بالمختصر المفيد شريحتك السعودية بتصير شامبو وبلسم اثنين في واحد شريحة سعودية واندونيسية في نفس الوقت.

عند اذان المغرب مرينا على بيتزا هت واستقبلونا استقبال طيب لان اللي باشر علينا سألنا من وين ويوم عرف ان احنا سعوديين رفع راية الترحيب وقال انه مسلم وقدم لنا شراب مجاني لانه كان وقت الافطار والشراب كان عباره عن ما ادري وشو لان طعمه غريب ولونه اصفر ويميل طعمه للشاي المخلوط بموز (وش رأيكم بالتركيبة) المهم اكلنا البيتزا اللي كان طعمها ايضا مختلف نوعا ما عن البيتزا هت اللي عندنا.
وبعدها فرينا في الاسواق لين تشلخت رجايلنا من التعب وحان دور المساج.
وهنا لي وقفه أيضا على موضوع المساج لاني تفاجأت ان كل محل مساج نروح له مسكر عشان رمضان وهذا امر من الحكومه ويمكن هذي اول حاجه نشوفها في جاكرتا تذكرك انك في رمضان.
ولكن تم انقاذنا في الفندق حيث أن الفندق يقدم خدمات المساج في الغرف 24 ساعة.

انتهت الليلة الثانية وبدينا اليوم الثالث في جاكرتا بالذهاب لمكتب كاها وحجز باكيج للذهاب لبالي واليكم تفاصيل الباكيج:
• تذكرة سفر جاكرتا – بالي – جاكرتا على طيران Lion Air .
• السكن في فندق أربع نجوم (Jayakarta) ليلتين.(غرفة بسرير مزدوج).
• الاستقبال في مطار بالي والتوصيل للفندق ومن الفندق للمطار.
• سيارة مع سائق من الثامنة صباحا وحتى الثامنة مساءا (شاملة جميع تكاليف الطريق).
سعر الباكيج للشخص الواحد: 2.300.000 يعني (250$).
اشترينا الباكيج بعد تخفيض 120 ألف وضبطنا رحلتنا على أساس ان يوم ثاني رحلتنا (يوم الثلاثاء) الساعة 11:00 الظهر نقلع من جاكرتا والوصول الساعة 2:00 مطار بالي والعودة يوم الخميس الساعة 9:00 مساءا نقلع من بالي والوصول الساعة 10:00 مساءا مطار جاكرتا مع فارق التوقيت (توقيت بالي يزيد ساعة عن جاكرتا وجاكرتا تزيد 4 ساعات عن توقيت السعودية).
وللمعلومية مكتب كاها اللي مقابل فندق أستون أتريوم هو المكتب الوحيد من مكاتب كاها اللي عنده باكيج لبالي والشخص المسئول عن الشغله كلها وعنده كل المعلومات والتفاصيل والحجوزات والأسعار اسمه فاروق ويتكلم عربي بشكل جيد ورقم جواله بسجله في دليل الهاتف نهاية التقرير.

بعدها انطلقنا لمطعم بندر جاكرتا وهو مطعم يستحق الزياره واللي راح جاكرتا وما أكل في هالمطعم فاته الكثير لانه جدا رائع. المطعم يقدم جميع انواع المأكولات البحريه حتى اللي ما تخطر في بالك موجوده هناك وانت اللي تختار طريقة الطبخ مشوي والا مقلي والا غيره وخدمه سريعه ورائعه. (أعتذر عن عدم ارفاقي لاي صوره للمطعم لاني نسيت الكاميرا في الفندق).
لاحظت ان مرتادي المطعم كلهم مولودين في نفس اليوم لانه كل شوي محتفلين بذكرى ميلاد واحد قلت مادام كذا الدعوى خليني اصير مثلهم وازهم عليهم واقول لهم انا اليوم ذكرى ميلادي واحتفلت بذكرى ميلادي التاسع وعشرين ونص و13 يوم.

وبعدها رجعنا الفندق وريحنا شوي واخر الليل صاحبي بدأ يشتكي الجوع وقلت له ما يردك الا سارينا هالوقت ورحنا سارينا واللي ما يعرف سارينا هذي طال عمركم منطقة راقيه وتمتاز ان المحلات فيها تكون فاتحه لوقت متأخر وتلقى فيها معظم الخدمات اللي تحتاجها,
اكلنا في ماكدونالدز وبعدها عدنا ادراجنا استعدادا للنوم والسفر الى بالي.

لم يعجبني في جاكرتا:
• إن كل سواقين التاكسي اللي ركبت معهم ما يعرفوا يتكلموا الا اندونيسي حتى الأرقام بالانجليزي مايعرفوها وحسيت نفسي مثل الأطرش في الزفة وفي أكثر الأماكن يمكن واحد في المئة اللي يتكلم انجليزي ومكسر أم اللغة بس يمشي الحال.
• مياه المجاري المنتشره على شكل جداول في الشوارع وبالتأكيد رائحتها ايضا منتشره مما يكدر صفو تمشيتك.

وهذي المجاري كرمكم الله اللي مشوهه جاكرتا

وقبل ان انتقل في موضوعي لبالي قد يتسائل البعض اين هي الصور واجيبه ان جاكرتا لم أجد فيها مناظر جذابه كي اصورها وبالتالي فان اكثر الصور ستكون في بالي وبونشاك وأما بالنسبه لصور الفندق فهي موجوده على موقع الفندق.