تقرير رحلتي لـ بلاد العمه ( اندونيسيا)

السلام عليكم ورحمة الله وبركاته
كيفكم وش اخباركم
اولا حاب اشكرالله ثم جميع الاعضاء والاداريين في هذا المنتدى العزيز على مايقدمونه من خدمات للمسافر
اليوم جايب لكم تقرير عن رحلتي لـ بلاد العمـه ( اندونيسيا ) طبعا انا وزوجتي
الرحله كانت من تاريخ 24 ديسمبر 2014 الى 4 يناير 2015على الخطوط الاماراتيه
وكان سعر التذكره 2220 ريال وكان سعرها اقل سعر بين الشركات الاخرى
فكرة السفر كانت قبل خمس شهور بس التخطيط للرحله كان قبل شهر
احوس وافر واجمع واستعلم عن الاماكن مع اني قد سافرت لها من قبل بس ماكنت اعرف الكثير
المهم خططة اكثر من جدول ورسيت على هذا الجدول
اول يوم وصول كان بالليل فـ خليتها راحه من تعب السفر .الله لايوريكم بس 🙁
وخمس ايام بونشاك .. وثلاث ايام باندونق واخر يومين جاكرتا عشان نكون قريبين من المطار وكذا
انا كنت حاجز الفنادق كلها من موقع البوكنق قبل ماسافر ماعاد الجبل بس واحد من اخوياني جزاه الله الف خير ضبطني في فندق سيروني . بس كان بـ رقم 2
جاكرتا اول يوم فندق swiss-Belnn Airport سعره كان لـ ليلة واحده بـ 562،900 روبيه
https://www.booking.com/hotel/id/swiss-belinn-airport.ar.html?aid=304142;label=postbooking_confemail;sid=3b1989ad9315ebff6860178b20b1b696;dcid=1;dist=0;type=total&
جبل بونشاك
سيروني 2 سعـر الليله بـ 800000 روبيه

باندونق فندق أستون تروبيكانا سعره كان لـثلاث ليالي 4،293،080 روبيه
https://www.booking.com/hotel/id/aston-tropicana-and-plaza.html?dksc=2&aid=376381&label=postbooking_confemail

وجاكرتا اخر يومين في فندق شيبوترا جاكارتا كان سعره لـ ليلتين 2،823،700 روبيه
https://www.booking.com/hotel/id/ciputrajakarta.ar.html?aid=356990;label=postbooking_confemail;sid=3b1989ad9315ebff6860178b20b1b696;dcid=1;dist=0;type=total&

طبعا التصوير اذا كان لك عليه فـ هوا من جوالي ايفون 5 لان خليت اخوي يرسلي الكاميرا ع شركة الزاجل بس للاسف تاخرت شوي ومايمديني اخذها

نبدا من مطار الملك فهد بالدمام كانت الرحله الفجر الساعه 4 وربع على طيران الامارات ترانزيت دبي 3 ساعات ونص اقلعنا الحمدلله لدبي واول مره ادخل مطار دبي وندخل وسالنا على بوابتنا ووصلنا هناك وخليت زوجتي تنتظر وتعال ياطلال فرفره بالمطار ماينمل يشيخ ماشاءلله من اول الصاله لاخرها رايح جاي هههههههههههه احس انهم شكو فيني يقولون وش عنده هذا يفرفر المهم قرب موعدالاقلاع كان الاقلاع الساعه 10 وعليها وسرا وتنظيم ويمين ويسار لين حركنا
وطرنا الى اندونيسيا وتقريبا سبع ونص او ثمان ساعات انا كنت محدد المقاعد انا وزوجتي جنب بعض وكان ثاني مقعد يعني الي قدامي مافي مقاعد قدامه واحنا ماجا احد جنبي يعني الطياره ماهي مليانه مرا ومن حسن حظي الي قدامي مافيها الا واحد واستاذن المظيف وقال تفضل وجلست قدام وخليت المره تتمدد شوي ع الكراسي
وصلنا الحمدلله ع الساعه 10 بتوقيتهم وبنفس الوقت كانت الخطوط القطريه معنا واصله وشف الزحمه الحمدلله عدت سهاله
بس عاد حصلي موقف مع موظف الجوازات وكنت متاكد انه بيحصل جاييكم بالقصه هالحين اول مادخلت الصاله خليت الموظفين الي يوزعون كرت الدخول يعبون الكروت طبعا موزعينها من اول ف الطايره بس ناسيها لين وصلنا المطار قلت بعبيها بالمطار واشوف الشباب جنبي يكاسرون وهذولا يشرطون مبلغ عشان يعبونها قلت عاد صارت شغله هذي مو هديه والحين يبي فلوس وافرك جيبي مافي فكه كلها خمس ميه لقيت خمسين بالغلط طالعه بينهم وادفها وبخلص منه
المهم واصف سرا على كونتر دفع الفيزا طبعا انا صارف دولارات من المطار بالدمام فقط يعني ماصرفت روبيه وادفع وارجع لسرا الجوازات بعد انتظار تقريبا ساعه جا دوري وصلت له انا وزوجتي اول ماسلمته الجوازات يرفع لي ورقه مية ريال يقول جيب ثلاث ميه قلت ماعندي قال ميتين وصل معي لخمسين قلت لو تقول ريال ماعندي الا خمس ميه لو بتطلع لك نخله براسك ماعطيتك اياها طبعا وريته الخمس ميه وقلت ماعندي غيرها قال اوكي ويبي يشوف وجه المدام عشان يتاكد من الجواز قلت مو مشكله شف موظفه تجي تتاكد قال مافي موظفه وقلت ماني مخليك تشوفها لو تحب السما عشان ماعطيته الفلوس ويبي يسوي يعقدها قلت انا كذا كذا متاخر ويانا يانت ولله ماتذوق ريال هههههههههههههههههههه
قال مافي قلت شوف لك حل ولا كلم المدير قال روح كلمه قلت طيب وخرجت من السرا ولقيت المسؤول عنهم وعطيته القصه وجاب موظفه وتاكدة وبلغة رئيسه انه اوكي خلاص ورجعت له بنفس محلي وكان فيه سرا طويل المهم يوم شافني رجعت اول الصف يقول ارجع اخر الصف من جديد سويت نفسي ماشوفه اصلا التفت يمين ويسار وخلص الي بيده وجيته قلت خلاص قال مايجيب فلوس قلت انا ماصرفت ومامعي الا خمس ميه انت من وين تفهم بالقوه الفلوس المهم ختم الجوازات وانا اطالع فيه بضحكه وهو يناظر بحقد واسحب عليه واخذ عفشي واطلع برا طبعا يوم كنت بصف كوانتر الجوازات قدامي سعودي وزوجته ويوم طلعت برا انا منتظر السواق والتفت يمين وشمال واوصف له وكذا وهو مسكين يحسبني مضيع ههههههههههه جاني قال يالحبيب تعال وين رايح انت قلت فندق هنا قريب قال انا مثلك تعال ناخذ تاكسي سوا قلت انا عندي سواق تعال انت معي نروح نستاجر لك قال اوك وننطلق ع الفندق وكان موقعه كويس ونظيف جدا بس عيبه الغرف صغيره مرا يعني تصلح راحه وتمشي ع طول . اول ماوصلنا كان البطن يقرقع قرقعه والجوع واصل حده واحنا رايحين للفندق شفت لوحه عليها علامة ماكدونالدز وسهم يعني انه في طريقنا وصلنا الفندق وخلصت اموري وطلعت الغرفه طبعا معي خوينا ف الله الي قابلته بالمطار ونزلنا اخذنا عشا ورجعنا وتعشينا ونووومه ..

يتبـع ..