رحـلـتـنا المـحـفوفة إلى بلاد العـمة الـمـحبوبة

السادة مشرفين وأعضاء منتدى المسافر

السلام عليكم ورحمة الله وبركاته

أول شي أتقدم بأسفي لكم جميعا على تأخري بكتابة التقرير لأنه بعد عودتي لقيت أشغال

الدنيا على راسي وإذا حصلت وقت كافي اشتغل فيه بتصيغر الصور والكتابة عليها خبرك خويك

ماهنا خبره بالكومبيوتر والبرامج علشان كذا بطيء وبارد مثل الأندونيسيين هههههه

والتقرير بحاول اختصر فيه لقلة الصور مثلكم عارفين ضياع الكاميرا ضيع ثلاث ارباع التقرير

والباقي بحاول انزله على مواضيع مستقله لأني صورت في كاميرا الجوال اشياء كثيره

بعضها يصلح لمواضيع مستقله

بداية إنطلاق رحلتنا في يوم الأحد 3 شوال الموافق 14 أكتوبر نقطة إنطلاقنا من منطقة القصيم

أنا وسنديري و وبعدين على سيارتي المصونه متجهين إلى مدينة الدمام الحبيبه

تم الوصول إلى الدمام وقت المغرب دخلنا الدمام سيرنا على واحد من الربع وتقهوينا عنده

وكل شوي اشوف الساعه لاتطير الطياره تعرفون وانا راح نظام شيبان شبوبه مشتاق للعمه بالحيل

والله ونسفط السياره بكراج الخوي ( الطبيله ) <+++ كلمه حساويه ههههه ونتوكل على الله للمطار ونشحن العفش ونتكي في كفي شوب لين بقى على الرحله ساعه وندخل ونختم الجوزات ونضرب مشوار طويل لين البوابه وتأخرت الرحله حق ابو ساعه وشوي الرحله مقرره انه تطير الساعه 10 باليل وطبعا الخطوط الاتحاد طرنا لأبو ظبي ووصلنا وعلى طول من الطياره للطياره الثانيه والطياره الثانيه عليها زحمه عند البوابه ويوم راحت الزحمه ونركب الطياره المتوجهه لجاكرتا ونطير لجاكرتا محمد 333 ناوي ينام وبما انه اول مره يجرب خطوط الاتحاد قام وتنّح على الافلام يالله نومناه حق ابو ساعتين عشان يرتاح من الطريق من القصيم للدمام بصراحه اعجبتني خطوط الاتحاد نظام وخدمه بس فيهم عيب واحد الوجبات بارده بس وجبه وحده حاره لكن خدماتهم وابتسامتهم تغطي على كل عيوبهم وأفلام وكل شي عندك المهم مادريت الا ويقول الكابتن شدوا أحزمتكم ايها الركاب استعدادا للهبوط وترد الروح وإلا شوي وأقول قصيده بالإندونيسي بس خانتني اللغه وقفت الطياره تقريبا الساعه 2 الظهر وكل واحد منا يلقط عفشه ويدز يم الفيزه ونقص الفيزه أول الناس وندز للجوزات والحمدلله صرنا الاولين الاول انا واعطيه الجواز ويطقطق بجهازه ويطلب التذكره واعطيه اياه ويلمح بس من بعيد ماقالها علني ويعطيني جوازي وامشي بعدي وبعدين عطيته تذكرته ومشيت علشان اخذ عربيه واخذ العفش وجاني بعدي بشوي وننتظر سنديري ياولد ولدنا ضاع والا سرقوه الاندنوسيين وبعد عشر دقايق يجي وش فيك ياخال تأخرت قال يقولون تذكرتي مفتوحه وجلست افهمهم وافهم مديرهم ان هالتاريخ هو عودتي ويالله فهموا قلنا ماصار الا الخير عفشنا توه ماجاء ونجلس ننتظر العفش حوالي ساعه والسير يدور والعالم كلها تنتظر عفشها قلت اروح اصرف واشوف سعر الصرف واصرف لي 100 دولار بـ 890000 ألف روبيه ويوم اخذنا عفشنا رحنا يم الجمارك واقولهم الخطه اربعه اربعه واحد انا ادخل العفش وانت خذ العربيه وانت حمله من الجهه الثانيه خلونا نخلص من هالدبش تعرفون انا مهرب لي 4 كروز دخان وناخذ عفش ونتوجه إلى مكتب كاها ونشوف العربان متجمعين وناخذ لنا بفندق تريفا ثلاث غرف سعر الغرفه 340000 ألف روبيه مع الافطار واحوس بين المكاتب ابي لي سياره تودينا بسرعه وكلهم سيارات صغار ويالله احصل سياره جيب كيجان والله العالم إني اخذته بــ 160000 ألف روبيه ونركب ونتوجه إلى الفندق ونسوي تشيك إن وكل واحد يدخل غرفته ويريح شوي حق ابو ساعه وناخذ دش حار بارد كنت مصور الفندق والغرف بالكاميرا اللي ضاعت وسالفتها بعدين لكن نوريكم الصور اللي من الغرفه للخارج من هنا تشوف سوق الاتريوم والفنادق اللي حوله وما حول فندق تريفا

أنا تهيضت وأنا اكتب التقرير وشلون عاد اللي جالس يقشر بصل مع المايسترو بارون

ودزينا يم الاتريوم وقلنا نبي نشوف الصرف ونسأل الصيني ويقولنا الـ 100 دولا بــ 890500 ألف روبيه

يعني معقوله فرق عن المطار 500 روبيه ؟؟؟؟؟؟؟؟؟؟؟؟؟؟؟؟

أقول أمشوا وأخسروه هالصيني النصاب هو واللي عنده اللي تقول مأفوت يعني معفوط الله يعفط

راسك

ونروح للفندق وندقها نومه وما دريت الا وباب غرفتي يطق قم قم خير إنشالله وش تبي واثره

سنديري يقولي حنا جايين هنا ننام قم قمك ورقلك طيب كم الساعه اللحين قم واعلمك والله

وأقوم واثر الساعه تشير إلى الواحد والنصف ليلا ونقوم وناخذ دش ونتزين حق السهره لأن كل

اللي قابلتهم من ربعي بالاتريوم يقولون حنا من يوم العيد هنا وبلشين قلت هذا اللي يحب الثري

هذا مصيره ينطق ينام

ونطلع الساعه 2 ونص ونركب تاكسي من الشارع قالي سنديري يالله تفاهم معه قلت يابو الشباب

قال وين يابو حنا بالبطحاء تقول يابو شباب قلت ماعليك منك بس ( مقولة الرحله الشهيره )

المهم وقلنا للتاكسي اي ديسكو فاتح ودنا له قال ايو ويوقفنا عند ستاديوم قلت يامال الضربه كل

هالمشوار وتدوينا ستاديوم قال لا ادخل شوي فيه ديسكو هناك والله وندخل الداعوس وندرعم

ونعدي ستاديوم بـ 150 متر وندخل ذاك المبنى ونركب المصعد ونطلع فوق واثره ديسكو تكنو

وأدق على الشباب اللي لهم كم يوم بجاكرتا قلت ماعليكم منكم دبرتكم بسهره اليوم تعالوا

وندخل الديسكو وأسألهم عن اسمه قالو جي 2 عاد هو g2 أو j2 تعرفون نطقهم للانجليزي لكم

عليه شوي

ويوم خلصنا ونطلع وندقها رجليه يم مطعم كنتاكي اللي حوله على الشارع العام والجو طبيعي

وناكل وندك هالبطون ويوم طلعنا وإلا الدنيا مسيله يالله لك الحمد امطار وأرزق تعرفون وقت الوسم

وندز للفندق على الصبحيه والامطار الزينه ونتكي شوي بالفندق ونحط روسنا وننام

هذا اللي قدرت عليه مع تحاملي لأني تعبت وانا اكتب وأسولف وأتأسف لكم للمره الثانيه التقرير

هذا كله هذره وسواليف لقلة الصور اللي احملها

وانا آسف لكثرة الهذره لكن ودي يكون التقرير طويل وممل لقلة الصور

وأنتظرونا بباقي التقرير إنشاءالله تعالى

تحياتي لكم وأشواقي