الحمد لله على سلامتي وصلنا من اندونيسيا

شلونكم وشلون العيلان عساكم طيبين ان شاء الله

اليوم جايب لكم تقرير سفرتي وان شاء الله بكتب لكم وش سوينا بالظبط ان شاء الله
نبدا معكم:

اليوم الاول (( الثلاثاء 13/ 11/ 2007 ))

كنت مواصل وتعباااان حيل من جد قلت اخاف انام وبعدين تفوتني الطيارة << ياكثر مايوسوس هالولد
المهم كانت رحلتنا الساعة 4:20 دقيقة العصر على طيران الاتحاد بـ 2380 حاجزها من وكالة الطيار هو ارخص اللي شفته ولا الباقين من 2400 وفوق المهم اول ماوصلت المطارالملك خالد في الرياض كنت متواعد مع ولد خالتي اننا نتقابل هناك المهم اول مادخلنا من الدلاخة رحنا لصالة الطيران السعودية وندور ونسال واحد قال طيران الاتحاد في الصالات الثانية ونطلع ونطقها كعابي الين وصلنا للمكان اللي يقولون عنه وندخل ونشوف طيران الاتحاد سرا عليه واجد كلهم بنقالي وطقته ويجينا واحد من حقين المطار اللي يحملون العفش والله ياهو ذيبان ويدخل من بينهم ولاهمه احد والله لوه ماجانا كان ماخلصنا ولا كان بنصف في السرا ساعة ونص ونحط عفشنا ويعطونا البوردنق حق الرياض ابوظبي وحق ابو ظبي جاكرتا اول ماركبنا وكنت شايل هم اللي بيركب جنبي لايطلع بثر واشوا طلع اجنبي ومشاء الله عليه من يوم ركبنا ماجلسنا خمس دقايق الا وهو نايم اهيب ياوجه والله اللي نومة في مخباه الله يخلف علي المهم وصلنا واقسم بالله دجة ماندري وين نروح له المهم اننا رقدنا في فندق الترانزيت خذينا الغرفة بـ 650 ريال وقمنا على موعدنا واقلعنا على جاكرتا يقالي بواصل عشان انام في الطيارة هالثمان ساعات اللي بنطير فيها والله ولا شفت النوم خير شر اشوى بس فيه افلام ولا لو مافيه كان بنهبل

اليوم الثاني ((الاربعاء 14/ 11 ))
كانت رحلتنا الساعة 1 الصبح المهم ركبنا ونطقينا 8 ساعات اقسم بالله خلصت السوالف معد فيه سوالف مال من ولد خالتي في كل وقت اشوفة عاد يوم عطونا اول وجبة اول مرة اشوف خبز فيها مرتدلا وحاطين عليها فصفص انا اخبر اللي ينحط على الخبز سمسم بس يالله مش حالك المهم اننا كليناها خابور قبل مانوصل جاكرتا عطونا كرت الدخول عشان نعبية عاد انا كنت مترجم الكرت من زمان عشان اذا ركبنا نعبيها من نفسنا المهم ادور هالصورة عشان اعبي منها مالقيتها دورتها في شنطة اللاب توب ونفس الشي صارت في شنطة الملابس وشاحنينها والله الوهقة بس اشوا كان جنبنا اندونيسي سنايدي والله انه نشمي مع انه مايعرف يتكلم عربي وانا ماعرف اتكلم انجليزي مغير كل واحد يشر للثاني اخر شي قفلت اخلاقي عطيته جوازي وجواز ولد خالتي وقلت له عبها لنا والله انه ماقصر ولا لوه مهوب فيه كان فقيت خشتي خصوصا اني انا وولد خالتي اول مرة نطلع برا السعودية بس اشوا وصلنا وخلصنا من كلش ولقينا السكة لقمان كنت داق عليه من زمان اقسم بالله سكة بس يعجبك المهم اول ماطلعنا من المطار ويستقبلنا المطر دورنا شقق كلش فل مع اني مسجل حوالي 6 فنادق بس قل قلنا الشكوى لله ورحنا لشقة يعرفها لقمان بس والله حلوة غرفتين نوم وصاله ومطبخ مع الشغالة بـ 550 الف قلنا بناخذها يوم واحد بكرة بنطلع للجبل المهم رحنا ونزلنا عفشنا وطلعنا نتغدى في ابو نواس وبعدها طلعنا وشرينا شريحة سمباتي بـ 20 الف وشحناها بـ 50 الف ورحنا لسوق اتريوم مدري اذا كان صح علي ولا لا لان كان فيني النوم المهم تراه سوق رحنا وصرفنا منه كان الدولار بـ 9150 ربية صرف 700 دولار وبعدها رحنا للشقة وخذ لك ترويشة ع السريع وهيا السرير ياحبيلة والله

يتبعـ ..