والله فيني غبنة من الجوازات الفلبينية !!!

السلام عليكم ورحمة الله وبركاته
انا كان يوم سفري في 10 اكتوبر في الليل ووصلت مانيلا العصر على حسب توقيت الفلبين ..!

وصلت الجوازات اعطيتهم جوازي بدأت الموظفة تسألني اسألة وانا انجليزيتي لك عليها يعني لاباس قعدت تسال وقعدت اجاوب مثلا ليه جاي هنا هل انت طالب ومن دي الاسئلة فجاة مدري شكت في اش قامت وشالت جوازي ودخلت المكتب وراحت اعطت جوازي واوراقي لوحدة عجوز

قامت تسوي معاي تحقيق تخيلوا ياجماعة طلبت مني رخصة السواقة الخاصة بالسعودية انا داري انه مال دخل بس يعلم الله انها طلبته كانت تبي تمسك علي في اي شيء والشيء الحلو انه جبته معي واعطيتها اياه قامت انحشرت قامت طلبت اي دي يثبت اني ادرس في دولتي اعطيتها الايدي حق جامعة الملك عبدالعزيز لاني كنت طالب فيها .. مي عارفة وش تسوي قامت طلبت الهوية الاصلية لاني انا غير سعودي وعايش في السعودية قلتلها ماجبت الاصلي بس عندي صورة !!

فررحت من قلبها انه ماعندي عشان تمسك علي شيء وترجعني فيه للسعودية قلتلها بأدب واحترام انا معي صورة ومااكنت اعرف انه الهوية مهمة عندكم لانه هذي خاصة للسعودية قامت تسبني وتقول تعرف ولا ماتعرف هذا الشيء مايخصنا وبعدها قالتلي معك كرديت كارد قلتلها لا بس معي فلوس كاش قالت كم قلتلها الفين دولار قالت طلعهم طلعتها وشافت كل شيء قالتلي وين الايصال حق تحويل العملة من السعودي للدولار ):

والله حرااام هي قصة طويييييلة بس مجملها رجعوني للسعودية ورفضوا انهم يدخلوني والله غبنة وشيء يقهرر وعشرة ساعات وانا في الطايرة وخساير التذاكر بس نقول الحمدلله لعلها خيرة ..

اللي ابي اعرفه الحين كيف اقدر ارجع ثاني اغير جوازي ولا وش الهرجة اتمنى تساعدوني ؟؟