قصتي مع سواق التكسي

اولاً السلام عليكم جميعاً

ابشركم وصلت لبانكوك يوم الخميس الساعة تقريباً 10:30 بالليل… نزلنا وختمنا جوازاتنا  طبعاً فيزتي جاهزه ويوم خلصت واخذت شنطتي.رحت اصلي بعد ماصليت قلت ابروح اشوف الباص يمكن الحق عليه. نزلت تحت لقيتهم مقفلين شباب الباص. الساع حول 11. بعدين جيت اطلع فوق ولقيتهم يمنعون انك تطلع بشنطتك مع السلالم. تبي تطلع لحالك تطلع اما معك شنطه ممنوع مدري ليش. يمكن يبون الواحد اذا نزل يستاجر تكسي. المهم. فيه مصعد رحت لمه وشفت العسكري لاهي وطلعت للدور الثالث ورحت للتكاسي حقين المغادرون. قلت ارخص. بعدين لقيت واحد يأشر لي معه فان قلت يله اروح لمه رحت وقلت بتايا قال ب1500. قلت الخلا. قال التكاسي اللي تحت ب1500 وفوق. قلت داري اجل انا ليش جاي هنا ياكمخه. المهم. قال بكم تبي. قلت ب800 قال تم.  وانهبل انا. بسرعه وافق. قلت يمكن مافهم علي. لاني ماعرف اتكلم انقلينزي. اخبص معه. المهم واعيد الكلام عليه وهو شايل شنطتي. اقول له ايت هاندرد. يقول ايه يابن الحلال ايه. قلت الطريق هاي وي عليك قال. ايه. الله يخويك. قلت واش بلاه وافق بهالسرعه. واجي طال عمركم واصور لوحة السياره ايقالي عندي علم. ويركب ونتوكل على الله. وبدا يالله يمشي ويراسل بالجوال ويرسل صوت وحالته حاله واضح انن به بلا.  وانا صراحه خفت. وكل شوي يناظرن. وانا رجليني تصافق. معي بالبوك فوق 6000 ريال. قلت عزالله راحن. قلت خلك جامد يابوسيرين ولاتوريه انك مندفق عقلك. قال لي ترى 800 شويات. قلت كل تبن -تكرمون- انا متفق معك على كذا. قال لا بتعطين 1200 قلت انقلع. رجعن للمطار. قال ترى مااوديك مع طريق الهاي وي. قلت الا تودين غصبن عليك. انا متفق معك والا رجعن للمطار القى ازين منك. وهو مهددددي السرعه. كنه به بلا وانا انافخ عليه واتنافض المهم قال زدها شوي يالذيب.  قلت معصي قال 1100. قلت لا ويبدا ينزل شوي.  قلت بزيده 900 بس بصبر شوي بطلع روحه عند هالمية بات. المهم وهو ينزل ونا رااافض بالاخير قال بيني وبينك 900. قلت تم.  جت منه اشوا. ويفرح ويدعس.  يوم مشينا يمكن كيلو قال حصران ابطير الشراب بين الشجر. وانا صراحه دخلن الماء. ونزل وراح ورى السياره وانا اناضره بالمرايه واثره واقف خلف السيارة يكلم.  والله العظيم ياجماعة انه طاح قلبي من الخوف. الساعة وصلت 12 بالليل وانا لحالي. الله يستر.  المهم ويركب. ويمشي شوي وياقف عند ناس متجمعين بسياراتهم. حول 15 سياره وياقف معهم. قلت ياولد واش السالفه.  قال لي انزل.  قسم بالله العظيم هذا اللي صار. قلت وشو.  قال اركب مع راعي الكوريلا ذا. اخوي بيوصك لبتايا- اكيد يكذب مهب اخوه- وينزل راعي الكوريلا واثره صغير و شكله حبيييييب ويقعدون يمسحون مرتبة الراكب لي وراح الخوف عن الحمد لله. المهم. قلت واشو ذا.  اوبر والا ايش. قال لا هذا اخوي. قلت يدل. قال ايه اركب معه وماعليك. طبعا. انا صورة لوحة الكوريلا قدامهم. تخويف بس والا ماعندي ماعند جدتي وانطلقنا الى بتايا. وسواليف انا واياه. كلمه افهمه. و99 كلمه ماادري واش يقول وقال لي انه من بتايا وانه يشتغل يكد بسيارة الخاصة. وهذولا المجتمعين يتفقون مع التكاسي بدال مايضرب مشوار التكسي وهو من بانكوك يلقى احد يبي يروح لبتايا وياخذ هو نسبه. عندهم الظاهر قروب يعني التكاسي صارو سماسره. المهم وصلنا بتايا قال وين فندقك. قلت نزلن عند الفي سي. حاسبته ونزلت ومن قرادتي ماحجزت فندق قلت بشيك. طبعا وصولي متأخر فوق 1. دجت الفنادق اللي هناك كله فلللل. طبعاً على رجولي واسحب شنطتي وافتح قوقل واقودا ونفس الحكايه فلللل. رحت لفندق كل سكنته من قبل.  حق تمشية حال ورى المدرسه. يعني بعيد شوي. بس ولقيت عندهم غرفة. اخذتها ليله لين بكرى اشوف امدد والا اشوق شي زين.  وانا ارسل منه الحين والساعة 3 الفجر. وضابط القهوة واتفنجل واقدع من هالتميرات. وابطلع الحين ادوج شري. مع ان النوم مقطعن.  بس بنام لاطلع السفر ان شاء الله

نسيت اقول لكم  راعي السيارة اللي جابن لبتايا عطان رقمه يقول وزعه على اخوياك  يبون سواق يبون مساج يبون رحلات   قلت مايكون الا الزين  ودي اخدمه  بس يوم سألته عن الاسعار لقيته طميميع شوي   

طبعاً كل القصة علشان اقول لكم اذا بغيتو تكسي من المطار. روحو لصالة المغادرون فوق. وبتلقون اسعار. روووعة. 

هذا والسلام عليكم

ادري اني طولت عليكم وقرقي ماله فايده. بس المعذره.  ترى كني اسولف على اعز اصدقاي

واللي ببتايا. ودده نتشاوف. ترى لي الشرف. بس يأشر بصبعه ويرسل لي على الخاص. 

وسفرة سعيدة لكم جميعاً