يا جماعه لحد يسكن هالفندق تكفون (جاسمين هوتيل)

كليت مقلب من اقوى المقالب في حياتي في بتايا ، من تقريبا شهرين قلت هالمره بغير بطلع برا المنطقه العربيه بجرب فنادق الاجانب مليت من فنادق العرب و سوء المعامله و عدم الاحترام و قذارة الغرف ، و بديت افرفر بهالمواقع مثل موقع اقودا و تريب ادفايسر و غيره . و انا اتصفح لستة افضل الفنادق في بتايا طاحت عيني على فندق حاصل على المركز 12 على مستوى فنادق بتايا !!! و ما وراه باللسته الا فنادق مثل هيلتون و بابونا بيش و غيره من الفنادق الفخمه ، لكن اللي صدمني اكثر انه سعره 800 بات لليله !! و الفنادق الي قبل و بعده سعرهم ما يقل عن الفين بات ، قمت اقرى تعليقات اللي سكنو فيه الكل يمدحه و يرفع من جوه ماكو احد قال عيب واحد عنه و اللي خلاني انعجب فيه اكثر الصور الي حاطينهم بموقع الفندق صراحه صور خياليه ، قمت و توكلت على الله و دزيت للفندق ايميل عشان احجز و ردو علي و وافقو على الحجز و اتفقت معاهم على تاكسي ياخذني من المطار ، المهم ركبت مع التاكسي و صراحه التاكسي كان نظيف و سعره حلو (1200) و وصلت للفندق مكانه صاير بداعوس مسكر بنص الووكينق ستريت ، انا طبعا حجزت غرفه سوبريور بلكونه مطله على البحر على حسب كلامهم ، لما دخلت الغرفه بدات المأساه ، حسبت انه السالفه كاميرا خفيه و توقعت اي لحظه يقولون كانت معاك الكاميرا الخفيه !!
يا جماعه تخيلو الغرفه مافيها بلكونه و مافيها الا دريشه او ما تفتحها ولا بوجهك طوفة عمارة تايلنديين بوجهك تلمسها بيدك من قربها ، هذا ولا شي بالنسبه حق اللي بذكره الحين ، المصيبه الاكبر بالحمام
اكو حمام بالدنيا مافيه تهويه !!! تخيلو حمام مغلق مافيه ولا فتحة تهويه و المصيبه الثانيه انه المغسله صايره برا الحمام بالغرفه !!!
انا مادري منهو العبقري الي صمم الغرفه يعني شنو الهدف من انك تحط مغسله برا الحمام يا جماعه انا مابي ادش بالتفاصيل لكن تخيل شكلك عقب ما تخلص من مهمة انزال القوات العسكريه بالحمام و تحتاج انك تطلع برا عشان المغسله و اللي يضحك اكثر تخيل شكلك و معاك ضيف او ضيوف بالغرفه و انت تسوي هالشي هاهاهاها
و المصيبه الثالثه و الاعظم انه الحمام صراحه ما يصير نسميه حمام ، لانه عباره عن غرفه صغيره و فيها مرحاض بس !!!!
بانيو او شاور بوكس مافيها يعني تتسبح وقافي بس !!
و التكييف ما ادراك ما التكييف ، والله اني حسيت نفسي بمخيم بالصمان بشهر سته بالموت ينفخ هوا التكييف

بالاخير ما قعدت بالفندق غير ساعتين و شلت قشي و مشيت

لكن الحق ينقال انه تعامل موظفين الفندق راقي جدا

و بعد بحث و تحري اكتشفت سر النصبه اللي انصبت فيها عن طريق موقع تريب ادفايسر ، اكتشف انه صاحب الفندق نفسه و هو استرالي يدش موقع تريب ادفايسر و يعطي تقييمات للفندق يكتب كلام يمدح الفندق يعمل حاله شخص سكن فيه و بنفس الوقت هو يرد على هالكلام بأسمه هو مدير الفندق و النص الثاني كلهم هنود و طبعا تعرفون الهنود يرضون يسكن لو ببالوعه لكن اهم شي يكون رخيص

ادري اني طولت بالكلام لكن يا جماعه انا قاعد اكتب هالكلام و اضحك لانه صراحه موقف مضحك و مبكي بنفس الوقت

هذي صفحة فندق النكبه بموقع تريب ادفايسر للي حاب يضحك
Jasmine Hotel Pattaya (Pattaya, Thailand) – Hotel Reviews – TripAdvisor