ملخص رحلتي لتايلند…..(بانكوك-شنغماي-بوكت)

السلام عليكم ورحمه الله وبركاته…تحيه طيبه لكل اعضاء وزوار منتديات المسافر الكرام..

حبينا نشارك معاكم ونضع بين ايديكم ملخص رحلتنا الا الاراضي التايلنديه..

موعد السفر كان بتاريخ 14-7-2007 …مده الاقامه كانت اسبوعين المدن المخطط لها..

بانكوك&شنغماي&بوكت….

الخطوط الناقله..طيران الاتحاد الاماراتي

بدايه الرحله كانت من الرياض الاقلاع الساعه الرابعه فجراً وصلنا مطار ابوظبي الساعه

الساعه السادسه تقريباً…توقفنا في مطار ابوظبي قرابه الساعه ونصف الساعه..بعد ذلك

اعلن عن رحله بانكوك…توجهنا للطائره وودعنا مطار ابوظبي وصاله الترانزيت المليئه بكافه

الجنسيات خاصه (الهنود)…

جلسنا في مقاعدنا وربطنا الاحزمه وطاااارت الطياره 🙂

اثناء الرحله قدموا لنا وجبه افطار.. بعد الافطار اغلقت الانوار ونام المسافرون 🙂 طبعاً كان في

المقاعد شاشات وبألامكان متابعه الافلام والالعاب وغيرها كذلك يوجد الدردشه حيث بالامكان

الدردشه مع ركاب الطياره بالجوووو 🙂

بالنسبه لي اانا حطيت اذاعه القرأن ومشاهده خط سير الطائره…

المخيف بالطياره انه يوم صارت فوق الهند بدأت المطبات الهوائيه والمضيفه كانت مصريه وانواع

التخويف لاحد يقوم من مكانه الطائره تمر بمطبات هوائيه..صرنا على ذا الحال الا تقريباً تايلند

المهم قربنا من تايلند وكانت غيوم وكان الوقت على المغرب ..

اعلن ربط الاحزمه استعداد للهبوط…

هبطنا بسلام في مطار بانكوك الدولي الجديد وكان جداً رائع Suvarnabhume Airport

نزلنا من الطياره وتوجهنا لتختيم الجوازات وكان السرا زحمه وطووووووووووووويل ..

المهم مسكنا سرا مع العالم وجائت المفاجئه يوم وصلنا الدور رجعتنا الموظفه 🙂 🙂

طلع في ورقه لازم تعبيها وانت بالطياره بس وقت توزيعها كنا نايمين..ولاحد من المضيفين نبهنا

ولاقال شي المهم رجعنا لكاونتر موجود بالمطار وفيه اوراق تأخذ ورقه وتعبيها الاسم والجنسيه

وتاريخ الميلاد ورقم الرحله ومكان السكن في تايلند وغيره…

رجعنا مسكنا سرا مره ثانيه وذا المره عدددت على خير توجهنا بعدها لاستلام الحقائب

بعد مااخذنا حقائبنا توجهنا لمكتب حجوزات لاننا بنجلس يوم في بانكوك ومن بكرا عندنا رحله

لعروس الشمال شنغماي 🙂

قررنا نأخذ فندق Novotel Suvarnabhume Airport Hotel وكان سعره 200$

اخذناه لانه جمب المطار لان رحلتنا بالغد لشنغماي ..

فندق جميل من جميع النواحي بس مايستاهل سعره لان ديكوراته خاصه الغرف عادي

اخذنا غرفه ديلوكس..طبعاً وصلنا تعبانين ونمنا..في الصباح اكتشفنا ان الغرفه تطل على

المسبح..نزل اللبي وافطرنا وكان الفطور مجاني مع الغرفه وكان فطور لذيذ بس نصه

ماتدري وش يتكون منه :)..بعد الفطور طلعنا نتمشى حوالين الفندق ونشوف طبيعه الجو صراحه

غيوووم بس الرطوبه عاليه شوي..رجعنا الغرفه وجهزنا اغراضنا استعداد لمغادره الفندق

وموعد الشيك اوت كان الساعه 12 الظهر..

توجهنا للمطار اللي هو جمب المطار بس لازم نروح له بسياره عن طريق الفندق مجاناً..

دخلنا مطار بانكوك الدولي وكانت الرحله على الخطوط التايلنديه Thai Airways

طبعاً كان زحمــــــــــــــــــــــه مطارهم ..توجهنا لكاونتر خاص بالخطوط Thai تفاجئنا من الموظفه

تقول ان رحلتكم لشنغماي من المطار القديم…!!!!!!

ولاكنـــــــــــــــ هناك رحله من هذا المطار ولاكن بعد تقريباً ثلاث ساعات.. احترنا بين قص البوردنق

او الذهاب للمطار القديم ولاااااكن لو رحنا المطار الثاني مراح نلحق على الرحله..

فقررنا نقص البوردنق وندخل الشنط…ثلاث ساعات طويله ولاكانها ضاااااااااااااعت في مطار بانكوك

مطار كبير ومزحوم من جميع الجنسيات..

مليان محلات مطاعم مقاهي يعني مايحس الواحد بالوقت…طلعنا الدور الثاني للمقاهي وقلنا

نتقهوى ونضيع وقت الااااموعد الرحله…

اعلن عن رحله شنغماي وتوجهنا لل0بوابه المحدده..وكان هناك تفتيش على الحقائب اليدويه

يعني ممنوع تأخذ سوائل ومشروبات يصادرونها .. صعدنا الطياره ربطنا الاحزمه استعداد للاقلاع

اثناء الرحله قدمت لنا وجبه خفيفه عباره عن فطيره تفاح وعصير برتقال (تكلفوا على الوجبه)

المهم الطريق كله غيوم وسحاب ومطبات هوائيه بس المناظر ممتعه 🙂

استغرفت الرحله ساعه وربع الساعه تقريباً

هبطنا في مطار شنغماي ونزلنا من الطياره وتوجهنا لاستلام الحقائب بعدين توجهنا لمكاتب

التاكسي لتوصيلنا للفندق المحدد ( اشكر الاخ مازن اللي رتب حجوزاتي في الفنادق وارسل لي

الفاوتشرات )

مكان اقامتنا كان في Yaang Come Village

فندق رائع بكل معنى الكلمه من جميع النواحي وهو اشبه بمنتجع والاجمل في انه يبعد خطوات

من النايت بازار..

فندق جداً هادي ورايق واعطيه 10 على 10 الغرفه كانت ديلوكس روم وكان الانترنت مجاناً..

المده الي بنقضيها في شنغماي هي اربع ليالي…في اليوم الاول لم نخرج من الفندق..

طلبنا عشاء من الفندق ولم نجد شي مضمون (حلال) الا السي فود مافي خوف من اكله

كان لابئس به..

في الغد طلعنا نستكشف الديره 🙂 اول ماطلعنا توجهنا للنايت بازار وكان فيه مركز مختص بالاجهزه

وبعض المحلات للملابس وغيرها..وبعض المطاعم الوجبات السريعه(ماكدونلدز) وبعض المقاهي

مثل (ستاربكس) …كان الجو يميل للحراره..اثناء تجولنا بالشارع يقف بعض سواقين التكاسي

ويستعرضون بعض الصور لمناطق سياحيه ..لاكن كان تخطيطنا نأخذ الرحلات من نفس الفندق

اضمن..لفت انتباهنا مركبه تسمى التوك توك احسن من السياره بنظري في تلك المناطق لانها

جداً ممتعه خاصه اذا مافيه زحمه سيارات 🙂 ركبنا في التوك توك واتفقنا مع السواق يلف فينا في

شوارع شنغماي يعني يفرجنا البلد 🙂 بمبلغ 200 بات

رحنا النهر وكان فيه قوارب ولاكن المكان مايشجع على ركوب قارب 🙂

مرينا على المعابد ولاكن مادخلناها بس من برا تفرجنا عليها ونشوف العالم يطلعون يصيحون

منها 🙂 يقالهم خاشعين ياربي لك الحمد على نعمه الاسلام

بعد مالفينا ولفت روسنا قلنا للسواق ودينا لاحد المراكز عندكم الكبيره قال احسن شي هو

Airport Center وله اسماء ثانيه نزلنا عنده وحاسبناه بعدها اكتشفنا انه مايفتح الا الساعه

11 يعني باقي نص ساعه وجلسنا عند البوابه كننا شحاذين 🙂 بس ماكنا لحالنا كان في سياح

واجد ينتظرونه يفتح .

دخلنا المول وصراحه رايق وكبير ومحلاته ممتازه جلسنا في ستار بكس واخذنا كافي وتراميسو

ولفينا بعدها السوق طلعنا الدور الثالث على مااظن وكان مخصص للاجهزه..وكنا ندور كرت برقم

لخط ون تو كول وحصلناه وشحنا بــ500 بات …صار الوقت الظهر وقت غداء توجهنا للدور المخصص

للمطاعم.. ودخلنا بيتزاهت وتغدينا بعدها طلعنا من المول وتوجهنا للفندق عن طريق التوك توك

استفسرنا على الرحلات السياحيه واسعارها وقررنا نروح الهاي ماونتين وهي اعلى قمه في

تايلند من بكرا تكون مع سائق بسياره خاصه حجزنا عليها…

طلعنا بعدها النايت بازار وتمشين فيه ونشوفهم بدوا يبسطون اكشاكهم على يمين الخط وشماله

جلسنا في احد المقاهي على الشارع وتسوقنا من النايت بازار حيث يوجد بعض الصناعات

اليدويه الي تشتهر فيها شنغماي ..بعدها رجعنا الفندق

في اليوم التالي فئنا بكير ونزلنا نفطر وبعدها خبرونا ان الشوفير ينتظرنا عشان الرحله للهاي ماونتين

ركبنا معاه وكان الطريق بحدود ساعه ونص..

كان الطريق جداااااااااًً ممتع اجواء جداً رائعه مطر وغيم والبروده كلمالها تزززززيد..اصبحنا بأرتفاع

1500 متر عن سطح البحر ودخلنا في السحاب كان الطريق بين جبال وغابات وسحاب ومطر

فعلاً اجواء جميله..نزلنا من السياره نتفرج على المنطقه وكان فيه بعض السياح العرب خاصه

وكانت الحراره تقريباً 10 وكنا في عز الظهررر وطبعاً ذبحنا البرد ولااستعدينا بملابس ثقيله..

فا اللي ناوي يروح هناك لازم يأخذ فروه معاه 🙂

اللي انقذنا ان فيه محل يبيع كل شي من ملابس وغيرها بس مو درجه اولى بس انه انقذنا

طقينا فنايل يقالها صوف بس تعبرنا فيها..

بعدين ركبنا مع السواق وطلبنا يودينا للشلالات وكان فيه كذا واحد وفعلاً طبيعه خيـــــــال

توجهنا بعدها للشلال الكبير وهو اكثر من رائع وهذي صورته ..

بعد قضاء وقت ممتع في الطبيعه الخلااااااابه انتهت الرحله ورجعنا الفندق…وحجزنا من بكرا

للسفاري الفنت من الفندق .. من بكرا افطرنا الصبح وركبنا مع نفس السائق اللي ودانا

الهاي ماونتين..الطريق للسفاري الفنت استغرق ساعه وصلنا المكان وكان وسط غابه وكان فيه

مسرح لمشاهده عروض الفيله

بعد الانتهاء من العرض توجهنا لركوب الفيله وكان شي جديد وممتع..ركبنا الفيل وعبر فينا النهر

ودخل بالغابه..واثناء تجوالنا بالغابه كان هناك اكشاك معلقه بالاشجار يبيعون موز وقصب سكر للفيل

وكانت قيمته 20 بات..وكل مامشينا مسافه يجينا كشك

نزلنا الفيل في مكان فيه اكشاك يبيعون فيها ملابس واكسسوارات صناعه يدويه بعدين ترجع

عن طريق عربه يجرها بقر توديك لمكان العرض..ركبنا مع السواق وودانا لمكان الغداء وصلنا

المكان وكان الغداء على شكل بوفيه من قسمين قسم للاكل التايلندي وقسم للاكل العالمي

ويطل على النهر.. بعد الغداء توجهنا لنادي الرمايه وكان تكلفته 4000 الاف بات..بس تجربه حلوه

كان هناك عروض للقرده وللثعابين بس ماتستهوينا فقررنا العوده للفندق… 🙂

في اليوم الرابع والاخير لنا في شنغماي قضيناه في النايت بازار وزياره Airport Center

في الصباح استعدينا لرحلتنا الا بوكت افطرنا وسوينا شيك اوت وتوجهنا للمطار كانت الرحله مليانه

خليجيين ..طرنا الظهر من شنغماي على الخطوط Thai في الجو كان منظر السحاب جداً رائع

بدأنا بالاقتراب من جزيره بوكت الساحره وكانت هذي المناظر من الطياره…

ربطنا الاحزمه استعداد للهبوط في مطار بوكت اخذنا الحقائب وتوجهنا لمكتب التاكسي

وكان فندقنا الي حاجزين فيه بالباتونق بيتش Phuket Graceland Resort &Spa

نوع الغرفه كان ديلوكس مطله على البحر ولاكان تفاجئنا ان الغرفه تطل على سطح 🙂 !!!!

طلبنا تغيرها على بالفوتشر الغرفه ديلوكس تطل على البحر..طبعاً الفندق فل ولافيه امكانيه

كان فيه غرف تطل على البحر قريبه من البيتش..كانت من نوع سويت وكانت القيمه اغلى طبعاً

من الديلوكس ..حجزنا في الفندق لمده ثلاث ايام حضرت المانجر المسئوله بالفندق وخفضت الفرق

واصبحت الزياده طوال الفتره 10000الاف بات 🙂 المهم اخذنا السويت وكان موقعه صراحه استراتيجي

عباره عن غرفه نوم مع بلكونه تطل على بركه السباحه

صاله فيها جلسه وبار وغلايه مويه وبلكونتين وحده تطل على بركه السباحه والثانيه على

البيتش

طبعاً البيتش كان بينا وبينه شارع قررنا نقضي اول يوم على البيتش وكان منظر الغروب جدا حلو

شاطي الباتونق يتميز عن غيره من الشواطي انه اكثر حركه وزحمه..والمحلات والاسواق والمطاعم

والمقاهي متوفره فيه وعلى الشاطي تمارس الرياضات البحريه…

في الصباح توجهنا لصاله الافطار وهي مجاني مع الغرفه وكان الفطور لذيذ.. لانه اغلب سكانه

عرب فا الخيرات والتنوع بالفطور موجوده..

طلعنا من الفندق وركبا التوك توك وهي سياره ولاكنها تشابه التوك توك طلبنا من السواق يودينا

مول كبير يكون بنفس الشاطي..

نزلنا في سوق يسمى Jungceylon

ومكانه بالشارع الخلفي لشارع البيتش وكان مركز جديد واغلبه ماركات وبنفس المركز توجد

سوبرماركت كارفور..وبعض المقاهي والمطاعم..وهالشارع اللي عليه المول كله محلات ومطاعم

والمطاعم العربيه والقهاوي على نفس الشارع بالاضافه للبارات..

بوكت اجوائها جميله جداً الامطار يومياً يبدا من الظهر الاااااااا الليل 🙂 لوصارت خضراء من المطر

اللي يجيهم.

في اليوم الثاني بعد الفطور ركبنا مع تأكسي وطلبنا منه يمشينا على اهم الشواطي غير الباتونق

وفي الاخير دخلنا مدينه بوكت ونزلنا في مول (لايحضرني اسمه) ودخلنا بالطريق مصنع ومعرض

للمجوهرات والاحجار الكريمه(احجار الحظ)وهو عباره عن دورين Wang Talang

ولاكن اسعارهم اعلى من اسعارنا بووووووواجد 🙂

رجعنا للباتونق بيتش وتغدينا في مطعم دبي على كثر ماشفت مدح له بالمنتديات بس صراحه

اكله لذيذ والزين انه حلاااال ماتتوهق ولاتشك بالاكل وانت تأكل

كنا ناوين نروح الجزر اللي هم جيمس بوند ولابيبي ايلند ولاكن الاجواء مطرررر على طول فاخفنا

نغرق بالمحيط ثم ماينفعنا لاجمس بوند ولاغيره 🙂

خلصت فتره اقامتنا في الباتونق بيتش وتوجهنا للكارون بيتش ولفندق الموفنبيك..لقضاء باقي المده

اللي هي ثلاث ايام..اخذنا فله دورين مع مسبح خاص بالصور مبين المسبح كبيييييييير

لاكن بالواقع اكتشفنا انه البانيو اكبر منه 🙂

اخذنا الفله يوم وباقي الايام غرفه ديلوكس مطله على البحر

الفله عباره عن غرفه نوم مع بار صغير وغلايه مويه ..وحديقه داخليه فيها كراسي وطاوله بمظله

والسطح فيه بركه السباحه 🙂 وكراسي

الفله كانت تطل على بحيره صغيره

الفندق عباره عن منتجع كبير والبيتش يبيلك تمشي كم خطوه على ماتوصل..والغرف المطله

على البيتش هي الشقق التابعه للموفنبيك

شاطي الكارون بيتش شاطي هااادي وراااااايق ولاتوجد فيه زحمه مثل الباتونق بيتش

يوم رجعنا للغرفه من البيتش لقينا هذا بالطريق ( ضفدع صغير ) 🙂

حجزنا من الفندق رحله للفناتزي لاند وكانت رحله مع قروب مع العشاء درجه عاديه…

الساعه 6 المغرب طلعنا من الفندق ومعنا شخصين في ميني باص مرينا فندق وركبوا عائله

بعدها توجهنا للفانتزي…

صراحه مدخله ابهاااااااار من الانبهار نسينا نصور 🙂

المهم قصينا التذاكر ودخلنا الفانتزي كان باقي على العرض ساعه ونص تقريبا في نفس الفانتزي

فيه محلات لبيع التذكارات والالعاب وغيرها وكان فيه مكان لمشاهده النمور والثعابين وغيرها

تدفع لها وتقص تذاكر لان تذاكر الفانتزي للعرض والعشاء بس 🙂

قبل العرض تكون وجبه العشاء توجهنا للصاله وكانت كبيرررررررررررره مره وكانت عباره عن بوفيه

واطباق منوعه تعشينا وتمشينا :)))) ليما اقترب وقت العرض فتحوا البوابات وطبعاً ممنوع دخول

الكاميرا ولا الجوال سلمناهم في صندوق الامانات ودخلنا الصاله…بدا العرض بدخول الفيله من بين

المدرجات وكان عرض رااااائع 🙂

بدت العروض تتوالى على المسرح مع انغام الموسيقى التايلانديه وصراحه عروضهم متعوب عليه

يعني فيها ابهار …

استمرت العروض ساعه بعدها طلعنا من الفانتزي وكان الجوووو ممطر 🙂

ركبنا الباص المخصص لفندقنا ..

بعد ماقضينا المده في بوكت كان موعد رحلتنا الا بانكوك..عملنا شيك اوت وتوجهنا لمطار بوكت

على الخطوط الـــ Thai اقلعنا الا بانكوك بعد ساعه وصلنا مطار بانكوك وكان مكان الهبوط المطار

القديم (مره قديم لدرجه ان الممرات فرشتها مبلله من المطر داخل عليها )

اخذنا الشنط وطلعنا برا مسكنا سرا للتأكسي ركبنا مع شايب مايفهم لاانقليزي ولا عربي ولاكن

بعد عده محاولات وقالنا له رقم الشارع عرف الوصف …كان فندقنا الللي حجزنا عليه

Davis Hotel فندق جديد له سنتين بس راقي وفخم وموقعه حلو واللي حواليه مقاهي ومطاعم

تمشي خطوات وتوصل محطه القطار المعلق <=== اهم شي في بانكوك .. بانكوك مده اقامتنا فيها ثلاث ايام بغرض التسوق..الغرفه كانت ديلوكس روم.. في اليوم الاول رحنا محطه القطار المعلق Sky Train وكان معنا خارطه تبين اسماء المحطات نزلنا في محطه سيام لوجود عدد من المراكز والمحلات التجاريه وكانت تجربته القطار حلوه 🙂 لانه سريع ونظيف يعني 5 ستار ويفكنا من الزحمه ويوصل المكان اللي تبيه دخلنا البراجون وهو مركز كله ماركات عالميه ومطاعم ومقاهي وبجانبه كان مركز سنتر وورلد وسيام سنتر وقضينا الوقت في منطقه سيام.. في الغد توجهنا برضوا على القطار المعلق لمجمع mbk وطوكيو سنتر مجمع ضخــــــــــم وزحمـــــــــــه واسعاره فيه الغالي وفيه الرخيص..كل دور في المجمع مختص بشي معين كان فيه دور مخصص للمطاعم العالميه دخلنا بيتزاهت وتغدينا …في الليل طلبنا من سائق التوك توك يودينا نايت بازار وكانت البضاعه مثل باقي البازارات اللي شفناها في شنغماي وبوكت بعدها رجعنا الفندق..في اليوم الاخير توجهنا الا منطقه نان العربيه واللتي اشبهها بالزبداني في سوريا مليئه بالعوائل الخليجيه والبعض من الرجال لابس الزي البلدي ثياب وشمغ 🙂 ماشفنا في المنطقه ماسمعنا عنه بالنت من انها منطقه مشبوهه تفاجئنا بوجود عوايل بكثرره فيها… لاكنها بالعموم منطقه وسخه ماهي سياحيه يقرف الواحد وهو يمشي بشوارعها حتى النايت بازار اللي فيها مو ذاك الزود ماعاد التحف 🙂 بعدها اخذنا تأكسي وتوجهنا للفندق واستعدينا لمغادره تايلند بالصبح..موعد الرحله بدري يعني الساعه 6 الصبح تسوي تشيك اوت 🙂 افطرنا الصبح وطلبنا تاكسي ومشينا المطار.. ويالله يالله لحقنا على الرحله..قصينا البوردنق وسيدا على البوابه وركبنا الطياره على طول وودعنا بانكوك.. خط الرحله بانكوك ابوظبي الرياض توقفنا في ابوظبي ساعه بعدين كملنا للرياض ووصلنا الظهر وطبعاً كان بأستقبالنا الحر والشمس وياربي لك الحمد على سلامتنا 🙂