بسم الله الرحمن الرحيم
اليوم السابع و الثامن
مثل ما قلنا في اليوم السابق طلعننا بعد المباراة على برشلونة ,, و صلنا برشلونه على أخر الليل أول ساعات الفجر تقريبا ..
وصلت الربع الفندق ورحت أسلم السيارة عسب أريح الراس و ما يكون عندنا شغل في هذا اليوم ,, خاصة أن عندنا قطار لمدريد ..
وصلنا السيارة و حطينا المفتاح في البوكس و رحت محطة القطار عسب أوصل للفندق ,, يوم ركبت القطار أدور التيلفون مب موجود و الكيمرا في السيارة !! شو هذا الحظ اليوم بكبره نحس .. طبعا ماقدر أرجع لأن مافي فايده لأني حطيت مفتاح السيارة في الصندوق ,, رحت الفندق و كلمتهم و قالوا خلاص نحن بنكلمه أول مايفتحون ,, رحت حطيت راسي و قلت حق الربع يوعوني بعد مايقومون و هم بعدهم مايعرفون سالفة التيلفون و الكيمرا ..
المهم قمت تلبست و خاصة أن عندنا موعد للقطار لمدريد ,, الربع يقولون لي أنته ناسي شي قلت لهم يب يب ,, أنتوا روحوا محطة القطار و أنا بروح أخذ أغراضي و إن شاء الله بلحقكم .. وهي ركض على محطة القطار على المحل ,, مساكين كانوا ينتظرون أول ماشافانوا عطوني أمانتي بدون كلام ,, و على طول عقبها على محطة القطارات عسب ألحق عليهم ولا الربع توهم واصلين ,,
خذنا القطار و توكلنا على مدريد ..
طبعا سوري على قلة الصور جدا ,, لأني كنت تعبان منتهي و فيني رقاد مب قادر أصور حاجه أبد ..
وصلنا لمدريد كنا حاجزين في نفس الفندق ,, خذنا الغرف ,, قلت للربع يالله نطلع لأني لو حطيت راسي مابقوم إلا الصبح ..
طلعنا نتمشى وكنا ندور فرايديز و لقيناه ,,
كان الجو مغيم الصراحه كان روعه ,, الربع قالوا نبغي أستار بوكس و نتيلس برع نشوف العالم دامه اخر يوم ,, قلنا فوقه ..
وصلنا طلبنا يلسنا شوي و لا تقوم الدنيا تمطر و كل واحد فتح مظلته ,, الربع كيف بتردون ما عندنا مظلات !! تحت المطر تحت المطر شو بدنا نعمل !!
رجعنا الفندق و عقبها ماطلعنا لأن الدنيا تمت تمطر لين ما أصبحنا ..
رتبنا الأغراض و سكرنا الشنط ,, قمنا الصبح كل واحد على راحته ,, يالله على المطار طبعا بالقطار و ليس بالتكسي ,, وصلنا و خلصنا أمورنا و طرنا و عدنا للبلاد ونحن بصحه و سلامة ..
في النهاية أكرر أعتذاري على هذا التقرير البسيط و الموجز الذي تنقصه الكثير من التفاصيل ,, لاني ما كنت محطي في بالي أن أنزل تقرير ..
العذر من الجميع على أخذ جزء من وقتهم الثمين ..
دمتم بود و نلقاكم على خير بإذن الله ..
المفضلات