الموضوع: بيض الله وجهك يا كويت

[align=justify]
بالأمس عدت من ألحبيبه الكويت ( الخميس 10-8-)2004 , وحصل لي موقف سرني و أسعدني جدا. لقد ضيعت طريقي و أوقفت سيارتي و سألت احد رجال المرور في حوالي. و كنت اعتقد انه سوف يساعدني بان يشرح لي أفضل طريق اسلكه ولاكتني كنت مخطاء , لقد طلب مني إن أقف على جنب ( لأنه كان مشغول جدا و الطريق كان مزدحم ) ثم جاني و قال سوف ابعث معك احد رجال المرور الذي سوف يوصلك إلى أسرع طريق .

والله أني خجلت من هذا الكرم و هذه الأخلاق ومنظر رجل المرور من إمامي و أنا خلفه و كأني رجل مهم.

أنا لا اعرف هذا الضابط و لا اعرف هذا الشرطي الذي كان إمامي و لأكن الله يعرفهم و إن شاء الله إن لا يرد دعاء من كان معي لهم.

شكرا لكم وهذا اقل شي أقوم به لكم.

إبراهيم - السعودية[/align]

مواضيع عشوائيه ممكن تكون تعجبك اخترناها لك:

• عرض التوفير الهائل من طيران الجزيرة والاسعار تشمل الضرائب
• مساعدة لمسافر للكويت
• تحفة رياضية على الطريق
• استفسار عن محلات فساتين سهره
• صيف العائلات في الكويت
• طالع للكويت ونبي الشور
• «التمدين لمراكز التسوق» تتوقع افتتاح مشروع الكويت في الربع الثاني
• ●۩۝۩●طلعتنا ل الافينوز ●۩۝۩●
• سؤال يطرح نفسه مطلوب فنادق على شارع الخليج
• استفسار حول سووووق
• المحلات المتخصصه؟
• متوهق وين اروح
• لا هنتوا يأهل الكويت الاسواق الشعبيه ؟؟
• من جرب فندق كورنيش ؟؟
• افتتاح فرع لشركة مباشر للسياحة في مطار الكويت
• مشكلة مع ايبيس السالميه وبوكنج
• ابى شاليه على البحر
• الله يخليكم ابي اعرف سكن في الفحيحيل
• استفسار عن المركز العلمي
• أرخو المساعده

السلام عليكم

حمدالله على السلامه اخوي وايهلا فيك مجدداً ...

والله اخوي اذا تبي الأصاله ماراح تبتعد عن أصالة أبناء دول الخليج الأصيلين الله يزيدهم ويثبتهم ياكريم .. والشعب الكويتي احببابنا ... سنبقى ونبقى مترابطين مهما بلغت بنا السنين ...

تحياتي وأشواقي

الأخ ابراهيم حمدالله على سلامة الوصول وكل اهل المملكة وباقي دول الخليج ياهلا فيكم وانتوا محل ترحيب وتقدير في اي وقت وكلنا بخدمتكم

الأخ إبراهيم
الحمدلله على السلامه
وهذا أمر ليس بمستغرب على أخواننا في الكويت
وبقية دول الخليج

زادنا الله ترابطاً وأخوة

[align=center]

تستاهلون

و حقكم أكبر من هذا بكثير يا أهل خليجنا الطيب

وحياكم الله دوما ودائما .


تحياتي .........[/align]

بصراحة الشعب الكويتي شعب اخلاق و مضياف و اهل الخليج معروفين بهالشي و لا شك ان الكويت منهم و لكن تمتاز صحيح مثل ماقلت يعني الشرطة كويتيين و اخلااقهم ممتازة , انا يوم رحت الكويت قبل شهرين او اقل بشوي كنت قاعد افتر بالسيارة مع رفيجي , و كنا ندور محطة بترول فاتحة ( بيستغرب اللي ما زار الكويت هذا تقريبا الشي السلبي الوحيد فيها ) انه محطات البترول عندهم بالكويت كثير منها تقفل بعد الساعة عشرة مساءا و طبعا احنا كنا يايين نقضي وقت و نستمتع فالمهم طلعنا من الفندق الساعة قريب ال 11 و الفندق على شارع الخليج و بعد ماتعشينا رحنا محطة بترول جريب للفندق بس كانوا حاطين عليها مثلثات مال الشارع هذي اللي يعني لا تدخل اهني , المهم دورنا غيرها و قعدنا نسال بس ماعرفنا يعني خبركم ما ندل الديرة عدل , فرجعنا للمحطة و دشينا ماهمنا اللي حاطينه ممنوع , دخلنا ووقفنا عند مكان البترول الا يايينا السكيروتي السوداني أمروا عاوزين حاجة ؟! ( يعني بالله هذا سؤال واحد ياي محطة بترول شيبي ؟! ههههههههه) المهم قلنا له لا بس بغينا نترس بترول الله يسلمك ؟! الا يقول مسكرة المحطة قلنا مسكرة الا يقول ايوة مسكرة من بعد الساعة 10 نسكر المحطة ( هههههه هاي محطة بترول و لا سينما المهم قلنا له زين ما تدل محطة ثانية فاتحة ؟! الا يقول و الله مدري و قعد يشرح لنا بس خفنا نضيع و رجعنا الفندق و كانت الساعه 12 تقريبا ( و ليلة جمعة) ..
المهم في طريقنا للفندق اهو كان جريب بس احنا لدخلنا بعض اللفات ( يازعم بنكتشف محطة او شي) المهم جريب شارع الخليج ما نشوف مرور و شرطة مبين انهم الظاهر يصيدون مخالفات حزام او رايبون او شي او يجيكون بطاقات شخصية و لياسن , المهم بسرعة قلت لرفيجي البس الحزام لبسناه قبل لا نوصل لهم و السيارة فيها رايبون من ورى كامل بس قلنا ما اعتقد يكلمونه عن الرايبون لانه مالهم شغل السيارة بحرينية , و صحيح ماكلمونه عن الرايبون بس جيك الرخصة و رخصة رفيجي بعد و انا سالته الشرطي قلت له ما تدل محطة بترول فاتحة ؟ قالي اسفط على جنب (وقفنا) على جنب و سفطنا على قولة الحبيب الشرطي الكويتي و يانا بعد اشوي و الله ماقصر حاول يدلنا بس الخوف انه نضيع و يمكن نقعد نفتر و يخلص البترول فقلنا نروح الفندق نسالهم يدلونه لانه كان جريب الفندق , و بالفعل رحنا الفندق و السايق مال الفندق خلانه نلحقه و دلنا على محطة بترول قريبة و بس , بس هذي الموقف ذكرني بموقف الاخ بس صج ترى شي غريب يا اهل الكويت ان كثير من محطات البترول عندكم تسكر من وقت يعني هذي اول دولة خليجية اشوف فيها هالشي , حتى في ردتنا البحرين كنت حاسب حسابي اشحن بترول من آخر محطة بترول في الكويت اللي عند حدود النويصيب و لكن للاسف انصدمت انها ايضا مقفلة و كانت الساعة قريب ال 6 الصبح !! يعني حتى اللي عند الحدود مقفلة !! بس الحمدلله اول ما دخلنا حدود السعودية بالخفجي كانت بويهنا محطة بترول و هذا الشي الوحييد اللي ما عجبني بالكويت و بالباقي كل شي تمام و حلو .

تحياتي راشد .

تسلموووون علي الكلام الراقي والجميل

اخوي راشد كلامك صحيح انه المحطات اغلبها اتسكر بالليل وهذا شي مزعج لنا يا اهل الديره اللي اندل فيها شلون للزوار

بس الحين بالكويت يبون يخصخصون محطات البترول وراح يخلونها شركات خاصه وانشالله راح تتطور اذا صارت شركات خاصه ويدخلون عليها خدمات جديده

وللعلم فقط شركة البترول الكويتية اللي اتشغل محطات البترول شركة حكوميه ودائما الشركات الحكوميه ادائها غير جيد

ونتمني لكم زياره سعيده للكويت ورحلات موفقه

والله أهل الكويت .. قمة في الأخلاق .. والشهادة لله

انا صار لي موقف ايضا يدل على طيب اهل الكويت

قبل اكثر من خمس سنوات قررت السفر انا وزميلي من مدينة حفر الباطن الى سوريا عن طريق الخطوط الكويتية (ارخص واقرب للحفر ) المهم كانت الرحلة الساعة 9 صباحا وقد اتينا من الساعة 5 صباحا الى المطار ولم يفتح بعد .

عندها سالت موظفي الخطوط عن الرحلة فاخبرني انه باقي على فتح الكونتر اكثر من ساعتين وطلب مني الجواز واوراق التذكرة فاستغربت خاصة وان المطار لم يفتح فاخبرني بانه سوف يحتفظ بالجواز والاوراق عنده لحين افتتاح الكونتر وحتى يظمن ان لااذهب انا وزميلي خارج المطار ونظيع طريق العودة وبالتالي تفوتنا الرحلة

بل قام مشكورا بفتح صالة الدرجة الاولى لنا حتى نستريح فيها !!

وهذا شيء ليس بمستغرب عن اهل الكويت

والشكر والتقدير لجميع اخواننا الكويتيين ...

أهل الكويت أهلنا وإخوانا وأبناء عمنا
والظفر عمره مايطلع من اللحم
ولو قعدنا نقول مواقف حصلت لنا أو سمعنا عنها من أهل هذا لبلد الطيب
ما كفانا المنتدى ....
ولو بحثت في اسر وعائلات أهل الكويت
لوجدت الكثير منها تربطهم علاقات قرابة ورحم بإسر وعائلات من أهل السعودية
وهذه العلاقة قديمة من أيام الغوص


ووالله عن نفسي مريت كل دول الخليج الكويت وقطر والبحرين والإمارات وعمان
وما كنت أحس إلا إني بين أهلي ...والله ماشفت إلا الكلمة الطيبة ووالنفس الزينة بمجرد ما يعرفون انك من أهل الخليج ......
لكن الأفعال الطيبة تتحدث عن أهلها
ولن انسى عندما استوقفتني تلك المخطوطات التاريخيه
و جلست اقراء ها وانا في متحف دولة قطر الشقيقة
وكانت تتحدث عن تاريخ الأسرة الحاكمة في قطر أسرة ال ثاني
وكيف كانت بداية الانطلاقة لهذه الاسرة المالكة
من منطقة الحريق في نجد قلب الجزيرة العربية ثم هاجرت
واستوطنت في ما يعرف الان بمدينة الدوحة
أرجو من الله ان يحفظ خليجنا الغالي وإخواننا المسلمين
في كل مكان وان يكفينا شر اعداء الاسلام والدين
كما أرجو ان يكون قدوم هذا الشهر الفضيل شهر رمضان
سببا لصفاء الأنفس وعونا لنا على الطاعة

يا حبي لك يالكويت

انا اتردد كثيرا على الكويت وفي هذا البلد لا احس بالغربة مطلقا

وكل الخليج شعب واحد

بنسبه لي الكويت هي ديرتي الثانيه
نص اقاربي هناك وما تمر سنه الا اروح لها مره او اكثر