الموضوع: سويسرا بعد تجربتي الشخصيه نصائح معلومات

بسم الله الرحمن الرحيم

الحمدلله ان الله سهل علي مدة تواجدي في سويسرا انا وزوجتي .... فحبيت اقدم شويه معلومات لعل غيري يستفيد منها بالبدايه مدة اقامتي في سويسرا 5 ايام من تاريخ 20-8-2012 الى 25-8-2012 وكانت في فندق Suisse SA في جنيف فندق 3 نجوم مقابل محطه القطار المركزيه
وخلال 5 ايام تم زياره ( جنيف - انترلاكن - شامونيه"الفرنسيه" - مصنع الشكولاته نستله )
انطباعي عن سويسرا بعد زيارتها :
- الشعب السويسري جدا مهتم بالسياحه فلا تجد مضايقات ولله الحمد .. الا نظرات للعبايه والنقاب لكن سرعان ما تزول

- كنت متوقع راح اواجه مشكله بالتفاهم معهم لكن طلع الاغلب تستطيع التفاهم معه بالانجليزي

- سويسرا بهالشهر الجو حار فلا تتوهق مثلي محمل كل الجاكيتات الي بالدولاب يكفيك جاكيت واحد اذا بتزور قمه ثلجيه

- لم استاجر سياره وكانت جميع التنقلات بالقطار او مع قروب سياحي ( تجربه القروب جدا ممتعه لان كل شي محجوز لك لا انتظارات ) بالنسبه لتذاكر الداخليه في سويسرا فيها ميزه انه تقص تذكره تستخدم لمره واحده وانت تحدد الوقت الي تحب تسافر فيه .... صوره توضح تذاكر القطار بسويسرا طبعا التذاكر الداخليه


وهذي صوره اخر للمعلومات الموجوده على التذاكر الدوليه للقطار


- التسوق فيها غالي بعد ما شافت المدام الاسعار في ميلان فانصح الي بيمر على دول غير سويسرا يخلي التسوق منها افضل

- اذا بتجلس في سويسرا او بتمر عليها فالافضل انك تصرف عملتهم ( الفرنك السويسري CHF ) حسب ما سمعت من سياح عرب انه يعاملون اليورو بقيمه الفرنك (يعني 1يورو=1فرنك) هذا اذا شريت كاش

نبدأ بالاماكن التي تم زيارتها :

(( جنيف ))
- انصح من لم يستاجر سياره السكن بالقرب من محطه القطار راح يرتاح لان كل شي راح يكون قريب منك والصوره توضح كلامي

- خصصت يوم كامل لتعرف على الاماكن السياحيه داخل جنيف واخر اليوم ملينا ... فريناها كلها !! فانصح انك تخصص لها نص يوم وبقيه اليوم تطلع رحله بحريه لا احد القرى القريبه من جنيف بالباخره

- تجد في سوق محطه القطار مكتب لشركه الاتصال swisscom وايضا مكتب بيع تذاكر القطار وفيه قسمين الاول لتذاكر الداخليه ودوامهم يتاخر اما القسم الاخر وهو لتذاكر الدوليه يفقل على الساعه 6:30 مساء .. وهذا رابط لبيع التذاكر الكتروني اعطاني اياه موظف منهم وقال تجد فيه سعر التذاكر اقل وللمعلوميه لم اجربه لكن للي حاب يشوف هذا الرابط http://www.sbb.ch/ticketshop

- بالنسبه للقروبات السياحيه حاب تحجز معاهم او تننقل بين المدن الاوربيه باستخدام الباص فيوجد في موقف الباصات الرئيسيه مكتب لبيع التذاكر واتوقع يقفل 8:00 مساء

- التسوق في جنيف كنت متوقع راح احصل مولات ضخمه واخرتها اسواقهم عباره عن شوارع كنك بشارع الصناعه ببريده ^^وهذي صوره لموقع شارع تسوق في جنيف


(( انترلاكن ))

- في انترلاكن محطتين وقوف للقطار الاولى "Interlaken West"وهذي اول محطه راح يتوقف فيها القطار وانصح انك تنزل فيها لان سنتر انترلاكن قريب منها وايضا الحديقه الى يهبط فيها هواه الطيران الشراعي قريب منها تتمشى في السنتر ثم تركب القطار وتتجه للمحطه الثانيه والاخيره"Interlaken Ost" طبعا بنفس التذكره ما يحتاج تذكره جديده .. على بعد خطوات من المحطه تحصل قمه (هاردر كولم) وايضا مطعم شاليمار الهندي تجد المطعم في فندق كارلتون يوروب


- من محطه "Interlaken Ost" اذا حبيت تزور شلالات ريخن باخ تقص تذكره الى قريه Meiringen ومنها تطلع لشلال والصوره تبين لك المسافه من المحطه الى الشلال


- لم اقم في انترلاكن لان اقامتي كانت في جنيف واغلب حجوزاتي السياحيه تنطلق من جنيف لكن لو اعيد الزياره كنت راح اجلس في انترلاكن على الاقل 4 ايام

- يوجد في سنتر انترلاكن مكتب اتصالات لشركه swisscom وايضا مكتب سياحي اذا حاب يزودونك بمعلومات عن الانشطه المتوفره

(( شامونيه الفرنسيه ))

- قريه ليست بالبعيده عن جنيف مسافه 82 كلم تقريبا (ساعه) فيها قمه ثلجيه اسمها Aiguille du Midi يبلغ ارتفاعها 3860 م وايضا قريب من القريه منحدر جليدي اسمه Mer du Glace فيه قطار خاص بهالمنحدر يطلعك له تجد محطته قريبه من سنتر القريه وخلف موقف الباصات وايضا يوجد فيها زحليقه صيفيه مناسبه للاطفال .... انصح تخصص لها يوم الصراحه الريف الفرنسي جدا جميل

(( مصنع الشكولاته Nestlé Suisse SA ))

- المصنع يقع في قريه Broc بشكل عام المصنع مو ذاك الزود بس تروح له عشان البرستيج ^^ .. فيه قلعه قديمه قريبه من المصنع Château de Gruyères يقولون انها قريه صاحب مصنع الشكولاته والقلعه اخذت اسمه (قيرير) انصح المرور عليها وايضا بالقرب من القلعه قريه اسمها La Chaux Dessous فيها كوخ يعد فيه الجبن اذا حاب تمر تشوف كيف يعد الجبن وجنب الكوخ فيه زحليقه صيفيه للي حاب يلعب البزران .. بالنسبه لي زرت جميع هالاماكن مع قروب سياحي وكان تنقلنا بالباص


- الاشياء الي ندمت اني ما سويتها : السكن في انترلاكن وايضا استئجار سياره

- الي حاب يعرف كم كلفتني مصاريف سبق وان كتبت موضوع ذكرت فيه الميزانيه

بالاخير انا لا ادعي المعرفه ولكن هذي معلومات اجتهدت في جمعها من خلال زيارتي لهذه الاماكن فإذا اصبت فمن الله .... ولا تنسون اخوكم من دعوه في ظهر الغيب

مواضيع عشوائيه ممكن تكون تعجبك اخترناها لك:

• اشاوركم وودي بمساعدتكم
• نداء للخبراء السفر لسويسرا والنمسا بمنتصف اكتوبر
• أجواء انترلاكن
• يشهد الله اني عشقتك يا سويسرا تقرير متكامل
• ارجوووكم استفسار سريييع ومهم جدا
• استفسارات رحلتي لسويسرا تحديث مستمر
• مساعده باماكن رومنسيه
• استفسار عن قرية القريبة من انترلاكن
• ارجو المساعدة في رحلة من سويسرا الى المانيا الى اسبانيا
• برنامج يومي في انترلاكن ابي رايكم فيه
• محتارة بين هالفنادق واحتاج مساعدتكم
• اليوم بس بديت افكر في السفرهل يمدينا نحجز او نلغي الفكرة
• مخطط لرحلتي شهر العسل
• مساعدتكم بشهر العسل زيوريخ أنترلاكن زيلامسي ميونيخ
• من يعطيني من وجهة نظره افضل تقرير عن جنيف
• ابي مشورتكم تبي مشورتكم لاهنتو
• الوصول والعودة من جنيف فرنسا سويسرا المانيا
• خبرتكم
• وسيلة التنقل
• ودي اروح سويسرا الريف الفرنسي

يعطيك العافية
و حنا كنا نفس الوقت هناك و فعلا الجو الحار كان صدمة بالنسبة لنا
مثلك ما خلينا جاكيت بالخزانة
انترلكن رائعة جلسنا فيها خمس ايام وما ملينا
و جنيف يوم ونص كانت للتسوق فقط من الموبايل

المشاركة الأصلية كتبت بواسطة Medo 77
http://www.arabtravelersforum.com/tr...5/#post7223565

جزاك الله خير على هالمعلومات الطيبة والشرح ..
واما صورة تذكرة القطار ..جدا جدا مفييييدة.
ياخي مشكلتي ان هذه الاوراق تتصرف عندي على طول ..ارجع وما الاقيها .


بالنسبة لمصنع الشوكولاتة ..هههههه.. للي يروح مصنع زي هذا اول مرة ..ينبسط.
بصراحة كانت تجربة جميلة جدا لي فيه.
لكن في النهاية الناس اذواق سبحان الله.


الله يعطيك العافية .
وبالتوفيق



شكرا اخوي ميدو على المرور على الموضوع .... للاخوه الاعضاء فضل بعد الله في نجاح زيارتي لسويسرا

وردا للجميل لهذا المنتدى ولمساعدة من يبحث عن بعض المعلومات .... وايضا نجنب المسافر العربي سأل الغرباء

المشاركة الأصلية كتبت بواسطة Miss. Swiss. 2012
http://www.arabtravelersforum.com/tr...1/#post7224251

يعطيك العافية
و حنا كنا نفس الوقت هناك و فعلا الجو الحار كان صدمة بالنسبة لنا
مثلك ما خلينا جاكيت بالخزانة
انترلكن رائعة جلسنا فيها خمس ايام وما ملينا
و جنيف يوم ونص كانت للتسوق فقط من الموبايل



الله يعافيك .... فعلا الجو كان صدمه لكن اختي سافروا بشهر 6 النمسا وكان الجو بارد وامطار ما اتهنوا بالطلعات من المطر

انترلاكن على الاقل 4 ايام او اكثر ولا راح تملي منها .... الله يكتب لنا ونعيد الزياره لها

كم كلفتك الرحله

جزاك الله خير على طرح المعلومات

عاد جنيف بالمره لاغيتها من الجدول ممكن نروح لها من انترلاكن لانو مالي نية تسوق فيها


وسفرتنا بتكون يونيو 6 ميلادي عسى بس يكون الجو معتدل مع رشة امطار