طلعت السنة هذي في الاجازة على بداية شهر أغسطس ولا أدري وين أروح ! … لما قالوا ابوي وعمي انهم بيروحون الاردن يشوفون أوضاع عيالنا اللي يدرسون هناك وعندهم ترم صيفي … قلت لابوي : ما تبي لك سوّاق ؟ قال : اركب … مشينا من الجبيل الساعة 7 الصبح … النعيرية – حفر الباطن – رفحاء – عرعر – طريف – القريات … وصلنا القريات الساعة 6 المغرب … ريحنا في القريات ساعة وقصينا التربتيك ودخلنا الاردن … وكل أمورنا تمام سواء في الجوازات السعودية أو الاردنية … وصلنا عمـّـان الساعة 9.30 بالليل … وصلنا شقة العيال و حطيت راسي نومة ما قمت منها الا 12 الظهر اليوم الثاني من تعب الطريق
أول يوم تغدينا في مطعم ريم البوادي … مطعم مشهور في عمـّـان بـ أكلة “المنسف” … وهذي صورة لمدخل المطعم
وهذي صورة المنسف … بصراحه اعجبني
طبعا اللي يروح للأردن ولا يروح للبحر الميت ما عنده سالفة … ومن ثاني يوم احنا هناك … أنا زرته قبل خمس سنوات وكان ما فيه اهتمام أبدا … لكن السنة هذي شفت منتجعات كثيرة على الشاطئ تقدم خدمات للزوار برسوم دخول … وهذي صورة للبحر الميت من منتجع شاطئ عمـّـان السياحي
أكثر مكان زرته في عمـّـان هو مجمع مكة مول … يومياً وجبة الفطور تكون فيه … مجمع كبير من أربع طوابق … فيه محلات لأشهر الماركات ومطاعم ومقاهي وأهم شي فيه سينما … اتفرجت فيه على فيلم كتكووت وفيلم ميامي فايس … رايق كثير هالمجمع ..
فيه مكان مشهور يستحق الزيارة … اسمه حدائق الملك حسين … فيه ملاعب رياضية وكافيهات … والمكان مزروع ويصلح “ممشى” … وفيه برضوو متحف السيارات الملكي … المتحف هذا فيه كل سيارات الملك حسين المشهور بحبه للسيارات … هذي صور من المتحف الملكي
فيه أماكن كثير زرتها لكن ما صورتها مثل حمامات معين (انصح بزيارتها) و المدرج الروماني والقرية العالمية وغيره من الاماكن … الأردن بلد سياحي جيد جداً … والصيف هذا كان مزحوم جدا بالسياح خصوصا الخليجيين … وأغلب السياح هناك يسكنون في أحياء عمـّـان الغربية … مثل الصويفية الشميساني الدوار الخامس عبدون الجبيهة …
