البداية ….. لماذا تونس؟؟أولا أنا كان ليا تجربه سابقه لزيارة تونس من 15 عام في تبادل شبابي بين مصر و تونس و أحمل لتونس ذكريات غير عاديه كأول بلد قمت بزيارتها
كانت المفاضلة بين عدة دول منها لبنان و تركيا و لكن فضلنا تونس لأنها الأكثر ملائمه للميزانيه الموضوعه وكما أوضحت أنها ليها مكانه خاصه عندي
بعض التجارب لراغبي السفر بوجه عام
*بمجرد الأستقرار على معاد مبدي لازم يتعمل حجز مبدئي للطيران لأن كلما كان الحجز مبكر كلما حصلت على سعر أفضل , ترددنا عدة مرات بين عدة مواعيد رفع سعر التذكره (كل يوم تأخير كانت التذكره بتغلى)
حجزنا على التونسيه يوم 4/3 الساعه 2:30 صباحا التذكره ب 1960 جنية و حجزت فنادق على booking.com
على أساس 3 ليله في تونس (فندق كارلتون 3 نجوم ) و ليلتين في الحمامات (فندق ريسيدنس 3 نجوم) و 3 ليله في سوسه (فندق فينشي القنطاوي 4 نجوم ) حتكلم على كل فندق على حدى و أسعارة في وقته
بس فعلا موقع booking ممتاز وليه مصداقيه كبيره و أسعاره الأفضل
*التأشيره سألت على المطلوب من السفاره و كانت المشكلة في الحساب البنكي لأني لا أتعامل مع بنوك بس الحمدلله قبلوا السجل التجاري للصيدليه كبديل
المهم الأوراق المطلوبه 2 صوره فتوغرافيه , جواز سفر ساري و 2 صوره , حجز فندق , كشف حساب بنكي , حجز طيران ,أفاده من جهه العمل
التأشيره أستلمتها بعد أسبوع (قبل السفر ب 4 أيام )بتكلفه 200 جنية
و بدأ الأستعدا النهائي للرحله (يعني قاعد على المنتدى ليل نهار وفي يدي ورقه و قلم و عمال أكتب )
كان التركيز على أقل كميه من المتاع عشان حنتنقل كذا مرة و بوسائل موصلات عامة
توقفنا عند بداية الرحله من مطار القاهرة الدولي
الحمدلله كانت بدايه الرحله موفقة بدون أي متاعب بس ببعض الملاحظات المحزنة
*واضح جدا قله عدد السياح و الوافدين من حركه الهدوء الغير عادية في مطار القاهرة ربنا يصلح الأحوال (أن شاء الله لما أحمل الصور حتفهموا و حتلاحظوا قله عدد المسافرين)
الطائرة الحمدلله قامت في معادها بدون تأخير و كان تقريبا نصفها خالي و أغلب الركاب توانسه
الرحله أستغرقت 2:40 وصلنا مطار قرطاج حوالي 5:05 بتوقيت تونس
زي ما ذكرت تقريبا كنت الغير تونسي الوحيد و دي كانت ظريفة أني أول واحد خرجت من المطار من غير ما الشنط تتفتح خالص بس المشكلة كلها كانت في سائقي التاكسي اللي منتظرين في البرد خارج المطار كلهم منتظرين الطائرة اللي جت
أنا حاولت أطبق تعليمات الأخوة في المنتدى (أوعى تأخد تاكسي من جوة المطار أخرج برة حيكون بالعداد)
جالي واحد و أنا جوة المطار قالي تاكسي قلتله لأ منتظر صديق المهم أعطاني رقمة عشان لو أحتجته في أي وقت ,
المهم أنا جرجت من باب المطار و الأخ ده ورايا فأستقبلني السائق الأول في طابور الأنتظار و هنا بدأت الخناقة بين الأثنين و أنا مش عارف أعمل أيه المهم توسط واحد أبن حلال و أنتهت المشكلة أني أركب مع اللي قابلني جوة و قد كان
كانت الليله السابقة ممطره و كان واضح على الأرض
المهم وصلنا فندق كارلتون حوالي الساعة 5:30 و دخلت لقيت الحجز موجود بس طبعا تسليم الغرفه مش قبل 12 ظهرا , هنا و سائق التاكسي مصمم يأخذني لفندق تاني !!!!! طب بلاش تعالى أخذك في جوله سيدي بوسعيد و قرطاج , مش عايز يسيبني و السلام , المهم أخذ الأجرة و كانت 10دينار , كان لسة الشروق مطلعش دخلنا صلينا الفجر و أنتظرنا لغاية النور ما طلع.
موقف طريف أول ما ظهرت معالم وسط البلد حبيت أعمل ناصح (بالمصري طبعا) و بقول للسائق ساحة 7 نوفمبر الراجل بصلي أوي و قالي 7 نوفمبر راحت مع اللي راح دلوقتي 14 جانفي و كان منظري وحش أوي
كنت عايز أقوله أعذرني أحنا في مصر لسة بنحارب عشان نثبت أن في ثورة أساسا (يالا مش وقتة دلوقتي)
لما الشمس طلعت سألت الريسيبشن لو خرجنا نتمشى أمان ولا في أي قلق و رد طبعا أمان و الصراحة طوال 8 أيام لم أرى الا الأمان في أي وقت
خرجنا نتمشى حوالين الفندق (و كانت أثار أمطار الأمس واضحه ) فضلنا لغايه 6:30 لغاية ما لقينا المترو شغال فقررنا نطلع مباشره على سيدي بوسعيد و قرطاج و أتجهنا لمحطه تونس البحريه و أخذنا القطار سعر التذكره 680مل
وصلنا سيدي بوسعيد و الواحد مش عارف يتجة أزاي بس الفطرة دلت الواحد و لقينا نفسنا ماشيين صح
أن شاء الله لما أحل مشكله تحميل الصور (الصور هي اللي تتكلم عن روعه المكان)
نصحية الصباح الباكر هو الوقت الأكثر روعه في سيدي بوسعيد ياريت محدش يفوت المتعة دي
قعدنا في قهوة سيدي الشبعانشربنا شاي بالبندق 3600 مليم و أكلنا كسكروت رويال 4500مليم
أفضل شئ في تونس أن أي مطعم أو قهوة لازم تكون واضعه قائمه الأسعار على المدخل و مافيش لا ضريبه مبيعات و لا خدمة حتضاف للفاتورة في الأخر
قرطاج
بأستخدام القطار المحطه المثاليه لأثار قرطاج هي قرطاج حنبعل و ليس قرطاج برصا كما ورد في تقرير سابق
تذكره الدخول 9 دينار و 1 دينار كاميرا
للأسف كان صعب أني أقدر أشوف كل أثار قرطاج فأكتفيت بالمسرح و حمام أنطوديادس و المنازل
المكان اللي يتمنى يقف علية أي مطرب عربي
أفكركم بس أن أحنا كل دة مكوناش نايمين من اليوم السابق خالص و معملناش تسجيل دخول للفندق حتى الأن
أول ما الساعة وصلت 12 كان لازم نرجع على الفندق عشان نرتاح
حجز الفندق كان عن طريق موقع عطلات و بصراحة فندق كارلتون هو الأفضل للميزانية المحدودة موقعة رائع و مستواة حتشوفوا شكل الغرفة و الأفطار جيد و سعرة الأرخص في وسط البلد
الليلة بالأفطار 530 جنيه مصري = 130 دينار تونسي
في ميزة مهمه أوي في الفندق نسيت أقولها أن النت اللاسيلكي مجاني في الغرف و سرعته كويسة أوي لما نزلنا على 5:30 أكتشفنا أن اليوم الأحد و كل السوق القديم مقفول , لفينا شوية في شارع الحبيب بورقيبة
أكلنا ساندويتش (كسكروت) اللي عادة بيتراوح سعرة بين 1500 الى 3500 مليم على حسب النوع , بس في محلات الأكلات السريعة المنتشرة في كل المدن
أخدنا أيس كريم سعر البوله 1 دينار
شارع القاهره أمام فندق أفريقا و بجوار فندق كارلتون ملئ بالمطاعم الشعبية التونسية
و ده كان وجهتنا لعشاء أول يوم
الكسكسي مكانش حلو خالص (الغالي ثمنه فيه)
و أنتهى يومنا الأول الطوييييل الملئ بالأحداث
كان الطقس رائع و مشمس طوال اليوم المهم قبل ما ننام أتفقنا نتحرك بكره من بدري على عين دراهم
تابعونا في رحلتنا الى أقصى شمال القارة الأفريقية في مقال أخر؟
