بتكلم عن تجربتي والتكنيك اللي استخدمته .. الفنادق اللي اخترتها كانت كلها قريبه من محطات القطالاات في كل مدينه زرتها وكنت احرص على الفنادق اللي فيها انترنت وافطار وهذا تكنيك مره ممتاز لانه وفر علي الكثير من الجهد في البحث عن الفندق وسهل طريقه الوصول له مشيا على الركب.
زياده على كذا كنت في قلب المدينه النابض يعني كل شي حولي. من مكتب معلومات الى شركات السياحه الى المترو يعني كان التكنيك موفق .
اليوم الاول..
وصلت الصباح الساعه 10 واخذت باص من مطار ciampino في روما
وللمعلوميه روما فيها مطارين هذا صغير وقريب من المدينه بالباص تقريبا 40 دقيقه مع زحمه الشوارع والمطار الثاني مطار كبير وبعيد من المدينه واسمه roma Fiumicino .
المهم تذكره الباص ب 4 يورو الى المحطه الرئيسيه roma termini stazione بعدها مثل ماقلتلكم الفندق قريب اخذت الشنتايه وعلى الفندق طبعا الخريطه معي وكل شي جاهز .
وصلت الفندق والاستقبال كان دافئ وجميل مثل الغرفه كانت رائعه.
بعدين اخذت معلومات اكثر من موظف الاستقبال وانطلقت لاكتشاف عاصمه الامبراطوريه العظمى روما
بصراحه لاحظت شي غريب على الطليان مادري وش السر . الشي هذا انهم في الخرائط تشوف المكان بعيد وهو على الطبيعه اقرب بكثير مما صورته الخريكه . حتى انو يوم وصلنا الى مطار روما خذونا من الطياره الى المطار بحافله والمساافه ماكانت تتجاوز 50 متر . الظاهر عندهم خلل في حساب المسافه
اخذت الخريطه وقررت اني امر على الاماكن السياحيه مرور الكرام وبكره تكون الزياره الرسميه .
قمت الصباح واول شي الكوفي الايطالي ( اسبريسو ) يعدل المزاج غصب عنك هههههههه وبعدها اتجهت الى باصات الاوبن تور ( open tour ) واخذت تذكره بـ 16 يورو .
انا انصح بقوه على اخذ هذا التور لانه جميل ومفيد ويزودونك بسماعات تعطيك معلومات عن الاماكن السياحيه اللي تمر بجوارها. يعني لاتفوتكم
والمكان اللي يشد انتباهك انزل من الباص واذا خلصت ارجع لنفس المكان وانتظر الباص الثاني واعتقد انو كل 20 دقيقه يجي باص .
طبعا نزلت من الباص اول ما قال الكلوسيوم , اممممممم تذكرت والله كان يوم جميل ,,,,,, تقدر تدخل الكلوسيوم وسعر التذكره تقريبا 16 يورو وسعر المرشد الالكتروني تقريبا 8 يورو واحسن شي انه متوفر باللغه العربيه , بس احرصوا انو يكون معاكم اثبات عشان مايعطون المرشد الالكتروني الا باثبات ( جواز سفر او رخصه قياده دوليه ) يقولون ضمان ..!!
بعدها تصورت مع محاربين الجلادياترز و من هناك مشينا الى كنيسه s.maria in cosmedin وفيها the Mouth of Truth وكان عليه طابور ياطوله لكن الحمدالله بعد انتظار لم يدم طويلا ظفرت بصوره هناك .
عقبها رجعت للباص ستوب ورحنا الى الفاتيكان , وكنت متلهف لزياره متحف الفاتيكان لكن لم يحالفني الحظ لانه يسكر الساعه 4 , لذا عدت ادراجي خائبا متحسرا .. وعشان اهون على نفسي شريت اسكريم وحطيت حرتي فيه حتى هدأت . شوي الا اشوف واحد من الرهبان وحوله القساوسه ولبسهم الغريب . لابسين ثياب صوفوعندهم عصيان ومتحزمين بحبال ولحاهم طويله تقول في عصر الجاهليه اشكالهم من قديم الزمان .
بعدين رجعت لباصي الحبيب ورحنا الى النافوره تيريفي والناس والعالم والجو الجميل وتصدقت على النافوره ببعض البنسات علني اعود الى روما مره اخرى او ربما تتحقق احدى امنياتي.
حل الظلام فقررنا ان نأكل وتخيلوا ماذا فعلنا لقد اكلنا بالفعل ههههههههههه
بعد الاكل اكيد نتمشى عملا بالمثل اللي يقول تعشى وتمشى والى برتش ستبز مكان جميل في الليل مع ايقاع القيتار من مجموعه شباب وصوت النافوره اللتي بالاسفل والناس اللي رايح واللي جاي واللي قاعد واللي واللي ….. الله بس
تأخر الوقت وغلبنا التعب فعدنا الى الفندق عن طريق المترو ( 1 يورو ) ..
في اليوم الثالث , كان يوم احد وعاد الطليان عندهم الاحد مثل الجمعه عندنا يعني كل شي مقفل . لذلك خليت الاماكن العامه لهذا اليوم .
قمنا الصباح , وافطرنا بيتزا الله ياذيك البيتزا , انشاء الله وفاءً مني للبيتزا الايطاليه اني رح اكتب موضوع مستقل عنها .
بعدها اسبريسو وكاسه مويه واحلى مزاج. بعدها اتجهنا الى محطه سبانيا ( spagna) بالميترو ورحنا للسبنش ستبز ومنها الى شارع التسوق via del croso ومشينا الى اخره الى ساحه piazza del popolo مكان جميل والورد الجوري يضفي عليه جمالا اكثر في ايدي العشاق وايدي البنغاليه اللي يبيعونه ههههههه
ورجعنا على نفس الشارع التجاري الى التيريفي واستمتعنا هناك بالجلسه ومشاهده العالم ولا انسى الجيلاتو
يوم خلصت اسكريماتنا قلنا خلاص الوداع يا نافوره تيريفي
وهلينا كم من دمعه هناك للذكرى خخخخخخ , ودعناها على امل اللقاء في مستقبل قريب او بعيد .
اتجهنا الى ساحه نوافو piazza navona وكانت هناك المفاجأة . الساحه هذي اعطيها 5 نجوم في تصنيفي واستغرب انها مهضومه اعلاميا يعني لم اقرأ عنها الكثير لذلك كان اهتمامي بها قليل . الى ان زرتها و وقفت عليها , كانت مليئه بالسياح الى جانب الباحثين عن رزق حلال او حرام لا ادري. لأول وهله عرفت انها تحمل الكثير من التسليه ولم يمضي غير بعيد حتى تأكدت من ذلك حين رأيت المهرجين والرسامين واصحاب المجسمات ووووو ………. استمتعنا بعرض لمهرج ايطالي هههههه حتى وجهه يضحك سبحان الله التقطنا الصور هنا وهناك وختمنا جولتنا بالرسومات الكاريكاتوريه ههههههههههههه
اليوم الرابع
كان تخطيطنا نروح بقطار الساعه 8 و 12 دقيقه لذلك قمنا بدري افطرنا وشرينا بساكيت وعصيرات حق الطريق ورحنا للمحطه عشان نشتري التذاكر , بس هذي اول مره وماندري كيف النظام المهم سألنا من فين نشتري التذاكر قالوا من الشباك والشباك مايفتح الا الساعه 8 يالله وش الحل ؟؟ هل نلحق ولا لا ؟! جات الساعه 8 ودقيقتين الا الموظفه تفتح الشباك وانا انقز لها وبر بر بر شوي تقصي لي التذاكر وكانت الوحده بـ 10.5 يورو والمكتب اخذ يورو حق السيرفس ويوم سألتها اي بلاتفورم قالت رح دوره بنفسك (اي سيرفس هذا )
طلعنا القطار مبسوطين وكانت رحله جميله ورغم ان كان فيني نوم لكن مانمت من جمال المناظر يمنه ويسره ..
وصلنا نابولي الساعه 10:30 واتجهنا الى فندقنا اللي كان امام المحطه , حطينا اغراضنا واخذنا معلومات من الريسيبشن والخرائط واتجهنا الى castel Vuovo وهي العلامه المميزه لنابولي القلعه بنيت في القرن 13 بأمر من الملك Charles I of Anjou حين انتقلت عاصمه مملكه سيسلي من باليرمو الى نابولي .
ثم اتجهنا الى Piazza del Plebiscito وهي اكبر ساحه في نابولي بنيت في القرن 19 وسميت بساحه الاستفتاء بعد الاستفتاء العام لانظمام نابولي للمملكه ايطاليا .
بعدها قلنا لازم ناخذ الباص تور رحنا لهم وشفنا خط السير والاماكن اللي رح نزورها بس مافي شي شد انتباهنا فقررنا نكنسل التور ونروح لجزيره كابري.
رحنا للعبارات اللي خلف القلعه وشرينا التذاكر الوحده بـ 16.5 تقريبا طبعا اول ما ركبنا العباره الناس كلها راكبه قدام شوي يجي الموظف يلاا ارجعوا ورا والناس مستغربين بيش؟ قال في المقدمه تكون الاهتزازات قويه وهذا يخلي الواحد يدوخ ويستفرغ ( اسف ) المهم يوم سمعوا الكلام هذا كلهم رجعوا ورا عاد جات فرصتنا انا وخويي تحدينا بعض من يقدر يتحمل ويالله على اول كرسي جانا الموظف قلنا لا تخاف وهم اصلا يوزعون اكياس بلاستيكيه في حال لا سمح الله ……
انطلقنا باتجاه كابري اللتي لا اعرف عنها الكثير , في نص الطريق صاحبي قال انا برجع ورا هههههههههههههه وانا فاطس ضحك عليه واطالع ورا اللي مغمض عيونه واللي رجع الى اخر العباره المهم حالتهم حاله وانا الحمدالله مستانس ومستمتع
وصلنا وفزت في التحدي وماقصر صاحبي اشترى ايسكريم لي على حسابه
اول ماوصلنا الا مكتب معلومات السائح قدامنا جيناهم وماقصروا عطونا معلومات كافيه وخرائط وقالوا يالله سيحوا في الجزيره واستمتعوا وهكذا فعلنا .. لكن تكسرت ارجولنا عشان نوصل للمكان اللي نبيه واصلا ضيعنا وحاولنا اكثر من مره ومافييششش فائده رحنا ندور تكاسي قالوا المكان اللي تبونه ماتوصله السياره لاحول
عقدنا اجتماع طارئ وبحثنا الحلول على الطاوله ورأينا ان نعود ادراجنا وكذا كذا احنا قد تفرجنا على الجزيره كلها من كثر المشي اللي مشيناه.
الجزيره مكونه من قريتين كابري و اناكابري ومشهوره بالليمون وكل شي بالليمون بسويت حلاو عصيرات حتى مشروبات كحوليه. الجزيره جميله جدا وتصلح اسبوع عسل هههههههه لانها هادئه ومعزوله من العالم وتحس انك في وسط الطبيعه يعني جبال واشجار وبحر وش تبي اكثر من كذا ؟؟؟؟؟؟ بس الحذر تجونها في الصيف يقولون الرطوبه تذبح
نزلنا وشفنا ناس تروح بالقوارب الى خلف الجزيره وهو المكان اللي كنا نبي نروحه
كل هذا التعب وفي الاخير فيه قوارب تروح هناك .. شوي الا يجينا رجال هااه تبون رحله الى faraglioni rocks لوحدكم قلنا اي والله تكفى قال بـ 60 يورو قلنا الا بـ 40 قال اجل بينا 50 قلنا تم قال بس بشرط اذا استمتعتوا تعطوني 60 قلنا ولا يهمك ..
وصراحه قمه قمه في الاستمتاع من كثر الاستمتاع عطيناه 100 بغى يطير من الفرح وعبينا قاربه ديزل وتعشينا مع بعض وصراحه الرجل حبيب ويعرف انجليزي شوي .
اممممم وش اقول ؟؟؟ وكيف اوصف لكم ؟؟ مناظر ولا اجمل من هيك والجزيره منظرها من البحر يجنن والبحر نفسه والقارب يعني كل شي قمه اخذنا القارب من مارينا قراند ولفينا على الجزيره الين وصلنا فارقليوني ومرينا على غار العشاق وسموه كذا لأن لونه احمر . وكانت رحله موفقه.
عدنا الى المارينا وتعشينا وعدنا الى نابولي .
قررنا ان نمشي في المدينه ونزور الاماكن السياحيه فيها لأن خطتنا هي يوم واحد في نابولي . مشينا على طول شارع corso umberto I وهو شارع تجاري , حاولنا نروح كنيسه santa chiara لكن لم نستطيع الوصول اليها . تابعنا مسيرنا الى duomo او Naples Cathedral لنقف على حقيقه الاسطوره اللتي لا تزال الكنيسه تطبقها الى الان . الاسطوره تقول ان الكنيسه يجب ان تحتفظ بقاروره
من دم القسيس وتخرجها الى الملأ مرتين في السنه اول سبت في شهر مايو وفي 19 من شهر سبتمبر ويجب اذابه الدم واذا لم ينجحوا في اذابته فان شيء مكروه سيحدث لنابولي.
بعد ذلك عدنا الى الفندق لأخذ قسطا من الراحه . وعند الساعه 10 قرصنا الجوع فقلنا هيا بنا نذهب الى احد المطاعم لنجرب بيتزا نابولي ! وفعلا نصحنا موظف الاستقبال بمطعم حولنا وكان مطعم جميل واكله لذيذ فأكلنا وعدنا للننام فغداً رحلتنا الى فلورانس .
اليوم الخامس ..
قبل ان نخلد الى النوم ذهبنا نشقر على المحطه وكيفيه شراء التذاكر لكي لانقع في نفس موقف يوم امس. عز الله رحنا وشفنا شرطه هناك وسألناهم وماقصروا علمونا كيفيه استخدام المكينه ( يسمونها مكينه بالايطاليه ) واشترينا التذاكر بـ 41 يورو للشخص.
رجعنا ونمنا بعد يوم انهكنا المشي فيه .. صحينا الصباح وافطرنا ( انا اعجبني الكراسوان حقهم فسرقت لي كم واحد ) واتجهنا الى محطه الا يشوفنا الشرطي اللي قابلناه البارح ويصيح لموظف شيل شنطهم و وصلهم للقطار ههههههههه حسينا انحن مهمين , وصلنا لكبينتنا ونصك الباب ونكمل النوم ههههههههه واحس مافيها انك تسكر الستاره ولا احد يجيك . وصلنا فلورانس لكن ليس محطتنا المطلوبه يعني لازم نغير القطار ولم يستغرق ذلك الكثير من الوقت وبعد 5 دقائق وصلنا الى محطتنا .. استبشرنا خيرا لأن الجو كان جميل جدا .
كالعاده نصل الى الفندق ثم الى مكتب معلومات السائح ثم الباص تور .. اشترينا تذاكر 48 ساعه وهذا ساعدنا في استكشاف فلورانس اكثر واكثر ..
قررنا ان ننزل عند نهر ارنو ونمشي بمحاذاته , استمتعنا هناك كثيرا .. ثم قادنا المسير الى جسر vecchio اللي يعتبر اقدم جسر في المدينه ومبني في اضيق نقطه في النهر .. تعرض لحوادث عده منها فيضان في عام 1117 وتم اعاده بناؤه وحريق في القرن 14 ايضا تم اعاده بناؤه بالحجاره .. الجسر جميل وتاريخه عريق واللي يميزه المحلات اللي فيه وكلها الان تهتم بالمجوهرات والاعمال الفنيه.
عدنا ادراجنا الى السنتر مرورا بالطرقات الضيقه اللتي توحي لك بأنك اصبحت جزءاً من التاريخ .. مررنا بعده ساحات وفي كلها تجد شيء ما يشدك اليها .. اما تمثال يصور تاريخ مجيد او عمل فني ينبئ عن حجم الفن الذي تحويه هذه المدينه.
ذهبنا الى مطعم بجوار الفندق ( مطعم تديره عائله ) يعني طبخ بيت , وكان عليه زحمه بس يستاهل , الاكل كان رائع جدا والاسعار في فلورانس معقوله جدا ..
بعدها عدنا الى الفندق لنغط في نوم عميق ..
اليوم الثاني في فينيس ..
فينيس تتكون من 117 جزيره , وقد كانت في القرن الثالث عشر الى الثامن عشر ميناء مهم في اوروبا . ازدهرت المدينه مما جعلها ارض خصبه لليهود فهم اصحاب صنعه وتجاره , حتى اصبح لهم فيها حي خاص بهم ( ghetto ) .
زادت الكثافه السكانيه وراد الطلب على المياه الجوفيه وكثر حفر الابار مما سبب في هبوط مستوى المدينه بشكل ملحوظ فقامت السلطات بمنع حفر الابار .
اصاب المدينه مرض الطاعون في القرن 16 هنا صمم احد الاطباء الفرنسيين قناع ذو انف طويل يشبه المنقار ( كان يضع فيه اعشاب وادويه لكيلا يصاب بالمرض عند معالجته للمرضى ) ويعد هذا القناع الاكثر شهره والاكثر تمييزا لفينيس . وهناك عده انواع من الاقنعه , قناع كامل الوجه , قناع للعينين , قناع لنصف الوجه ..
جميل .. هنا نرى الفرق شتان بيننا وبينهم ,, يستخدمون اقنعه واضحه مرئيه ونحن لدينا الاف الاقنعه المزيفه المختبئه خلف وجوهنا . ليس هذا موضع حديثنا
اخذنا شورت تور بالقندولا وقيمته 60 يورو , كان رائع .. مررنا بالقنوات المائيه الضيقه وعبرنا من تحت الجسور المتناثره هنا وهناك , اجواء رومانسيه لكن الشكوى لله لكن ان شاءالله فتاة الاحلام رح تعوضني في السفره الثانيه.
بعدها اتجهنا الى دار الاوبرا وحضرنا مسرحيه تحكي تاريخ فينيس وتاريخ الاقنعه .. قيمه التذاكر 24 يورو للشخص
وكانت تستاهل , استمتعنا واستفدنا في نفس الوقت.
عدنا الى ساحه سانت ماركو وتمشينا فيها واطعمنا الحمام وتصورنا مع محلنا راعي الايسكريم ياحبي له .. رجعنا للفندق اخذنا قسطا من الراحه لكن كان قسطا كبيرا ماصحينا الا الساعه 10 بالليل قمنا على طول نبي نلحق المطاعم , وابشركم اكلنا بس خلاص مافي نوم وكل شي مقفل قلنا يالله نتمشى بدون خريطه ايماناً بالمقوله ( اذا لم تضيع في فينيس فانك لم تزرها ) وعز الله ضيعنا من جد , رجعنا للخريطه بس مافي امل وساعتين واحنا مضيعين والدنيا اخر الليل وانا بديت اخاف , بس هديت نفسي وبدأت افكر في حلول اخرى غير المشي بلا وجهه , مشيت في طريق شبه مستقيم الى ان وصلت الى كنيسه وطلعتها على الخريطه وطلع ان المكان اللي احنا قاعدين نفحط فيه في اخر فينيس بس الحمد الله رجعنا بسلام بس والله خفت لأن الجو كان مخيف
اليوم التاسع .. توجهنا الى ميلان
اخذنا قطار من فينيس الساعه 11 صباحا لان سعر التذكره ارخص . وصلنا ميلان الساعه 2 ظهرا رحنا للفندق بس الفندق كان
سيء جدا من حيث معامله موظف الاستقبال لكن كان فقط لمدة يوم واحد فصبرنا وصابرنا .
انطلقنا الى الدومو وتمشينا في السوق مفتوح بجانب الدومو . استكشفنا المنطقه حتى وصلنا الى قلعه سفورزيسكو ( كان بيكهام وزوجته فكتوريا يخططان لشرائها لكن مجلس المدينه رفض ) . تعشينا في احد المطاعم المنتشره في شارع via dante
ثم عدنا ادراجنا الى الفندق .
كنا طول فتره البركان مترقبين وعندنا بصيص امل في ان المطارات رح تفتح قبل رحلتنا لكن عند الساعه 3 صباحا وصلني الخبر اليقين على متن رساله للجوال ان رحلتنا تكنسلت !!!!!!!!!!!!!!!!!!!!!!!!!!!!!!!!!!!!!!!!!!
عندها على طول تذكرت يوم كنا في فينيس وكنا في الفندق جالسين نفطر , كان اللي ساكنين معنا بريطانيين وقعدنا نسولف عن البركان وقالوا لا مارح يطول وصدفه قالوا ان رحلتهم معنا في نفس اليوم وتمنينا ان نلتقي في المطار مره ثانيه بس ماربي كتب .. فتحت البي بي سي اشوف وش اللي اقدر اسويه , قالوا اللي في اوروبا يتجهون الى اسبانيا لان رئيس الوزراء السابق قال رح نرسل باخرتين عسكريه وباصات لحمل الركاب الى بريطانيا . فكرت بالموضوع وقررنا نتجه الى مدريد , بعدها فكرنا نروح الى باريس بالقطار ومنها الى كالي ( المنفذ البحري في شمال فرنسا ) ومن هناك ناخذ سفينه الى دوفر وخلاص اذا وصلنا بريطانيا عاد كل شي يهون ..
فكرت ودبرت واستخرت ثم خطرت لي فكره جهنميه .. قلت خلني اكلم السفاره واشوف وش ممكن يسوون لمواطن مسكين مثلي , دقيت عليهم ماحد رد
وحولتني على سكرتير القنصل . سلام عليكم السلام ….. قلت ( ياطويل العمر ) انا مواطن سعودي مسكين حالي في بالي وعلى باب الله وحصل اللي انت قاعد تشوفه ومافي رحلات . وش ممكن تخدمني في هالحاله ؟ قال لحظه احولك على القنصل .. استبشرت خير قلت بس دام فيها القنصل اكيد الحين رح يسكنوني ورح يهتمون فيني الين يفرجها ربنا .. رد القنصل : اهلا يا ابني .. قلت له السالفه قال والله ماعندنا لك شي ( يفكرني اطر) قلتله طيب انا ماعندي فلوس قال نعطيك مبلغ وتكتب تعهد اذا وصل السعوديه تسدد المبلغ كامل .. ( للمعلوميه التسديد يكون في المطار يعني ماتقدر تدخل السعوديه الا لين واحد من اقاربك يسددهم )
قلت هذا اللي تقدر عليه قال ماعندنا الا طياره من ميلان الى السعوديه يوم الخميس ومثل ماقلتلك لازم تسدد كامل المبلغ اللي رح نعطيك ..
قلت بس هذي هي خدمتكم للمواطن السعودي ؟ قال يا ابني ماعندنا لك شي . قلت انت وش تفكرني اطلبك تتفضل علي ؟ هذا واجبك وفتحت الجواز الصفحه الاخيره وقمت اقرأ عليه ( نحن خادم الحرمين ……… ) قاطعني وقال ماعندنا لك شي .
والله ماكنت انتظر غير هذا الرد .. لأني عارف البير وغطاه ..
نزلنا الى مطعم الفندق لتناول وجبه الافطار , وكان بلا مبالغه كل النزلاء بريطانيين .. اللي على التلفون واللي على الكمبيتو ةاللي على الاخبار قلت بس فرصه .. وبدأت رحله البحث عن طرق العوده وكل واحد عنده رأي وغالبيتهم رح يمددون في الفندق ..
تشاورت مع صاحبي وقررنا نتجه الى باريس بالقطار وكل ماقربنا من بريطانيا تكون الفرص اكثر في الموصول الى بريطانيا.
رحنا للمحطه والناس طوابير على التذاكر , وقفنا ننتظر الدور ………. فيما نحن ننتظر الا بي اسمع شخص يحدث المرأة اللتي بخلفي : الى اين تودين الذهاب ؟ نحن ذاهبون الى كالي ونريد شخصين فقط
فتحت اذوني زين وهو قاعد يقول احنا مستأجرين سياره فان وناقصنا شخصين هي قالت لا انا عندي تذكره شكرا …………….. انا ماصدقت التفت عليه وقلت وش تقول ( مسوي ماسمعت شيء) قال كيت وكيت قلت احنا اثنين نفر قال حلو قلت حلوين .
تعرفنا على بعض وكان الرجل طيب جدا حتى انه ورانا جوازاتهم و اوراق السياره وكل شي قال عشان ماتخافون قلت الله اعلم من اللي رح يخاف من الثاني .
اتفقنا وقلنا خلاص انتظرونا هنا واحنا بنروح نجيب عفشنا من الفندق قالوا اوك .. سوينا تشك اوت وسألتنا الموظفه وش رح تسوون وعلمناها قالت اوووه انتم محظوظين لأن من الصعب تلاقون سيارات ايجار هذي الايام .
انطلقنا ولقيناهم منتظرين , رحنا للسياره وماقصرا عطونا المقعد الامامي .
سألت السواق شلون تسوق من غير نفقيتر او خريطه قال وش تقول انت , انا صار لي 5 سنوات وانا اطوف اوروبا بالسياره . الاخ طلع مدمن فرفره
قلت له طيب وش خط السير ؟ قال في خطين واحد من هنا على فرنسا مباشره بس طويل والثاني من هنا على سويسرا وبعدها على فرنسا وهو قصير نوعا ما .. قلت انت ابوها وسمها ( هو فهمها على طول )
