مخططه على سفره ان شاء الله في منتصف ابريل القادم النمسا – ايطاليا- سويسرا مدتهامن 12 الى 14يوما احنا اربع اشخاص وطفلين
وراح تكون فيينا 3 ايام ومن ضمنها راح اطلع الاوت لت الي في parndorf وبعدين بنطلع زيلامسي 3 ايام ومن زيلامسي بطلع يوم لكابرون وبنرجع زيلامسي بعدين بنطلع الى ميلان يومين وفينيسيا يومين بعدها بنطلع انترلاكن يومين وبعدها المحطه الاخيره زيورخ يومين او ثلاثه
انا كنت مخططه نبتدي بميونخ بس لاني ابي الاوت لت كنسلت ميونخ بفيينا
بغيت استفسر عن حالة الجو في منتصف ابريل وشلون راح يكون الخضار في زيلامسي وانترلاكن هل بيكون نفس الصيف ولا بيكون مايل للصفار
وهل مخططي حلو ولا لا والي عنده مخطط غير ياليت يقول لي او مناطق اخرى احلى من الي ذكرتها وهل عدد توزيع ايامي غلط لكل منطقه ياليت يبين لي واذا مخططي حلو ابي جدول لكل منطقه ذكرتها والاماكن الحلوه الي فيها
وناويين نستاجر سياره مرسيدس e class من يورو كار من فيينا والتسليم في زيورخ هل هي مزوده بقارمن ولا لا وتكفي السياره لاربع شناط كبار ولا لا واذا لا ابيكم تنصحوني بسياره غيرها
وبغيت اعرف اذا فيه ملاهي في مستوى ديزني لاند في الدول المذكوره ولا لا لان الاطفال الي معانا متولعين في ديزني بس انا مو حابه اروح فرنسا ابي اغير
وحتى الفنادق ابي فنادق حلوه ونظيفه واسعارها مناسبه مو مبالغ فيها لاني راح اضطر اخذ غرفتين او سويت بغرفتين
ياليت تفيدوني لان مابقى شي وابي احجز
الاجابة:
من الي سمعته ان باندروف افضل واكبر والماركات الموجوطه اكثر وحتى شفت الصور في النت وحسيت فيه فرق واذا انت رحت الاثنين وشفت ان فوكس تاون احلى ياليت تقولي في ايش احلى
والقارمن مايكون في السياره المستاجره ولا لازم اشتريه من قطر واضبط الاحداثيات من قطر
اجابة اخرى:
الترتيب الصحيح للمدن ..فيينا زيلاميسي فينيسيا ميلان انترلكن زيورخ .
الرحلة 1413 كم …ان شاء الله ما تكون متعبة ..لأن بين كل مدينة ومدينة فترة استراحة .
تقسيم الايام حلو …وعندي اقتراحات عليه :
اذا كان وصولك الى فيينا بدري ..يعني في الصباح الباكر ..فخلوها يومين ..واليوم الثالث رحلوه الى انترلكن .
انصحك بان تكون زيورخ 3 ايام ..يوم في شلالات الراين وكونستانس ويوم للملاهي (الكوني او اليوروب) ويوم في لوزيرن .
اذا ما كانت ميلان للتسوق ..انصح بالسكن في لوقانو القريبة منها ..ومنها زيارة اوتلت الفوكس تاون .
يوجد اوتلت بالقرب من فينيسيا..تقدرو تروحو له بالباص او السيارة
ملاحظة مهمة جدا :
الرجاء التنبه الى ان المولات والاوتلت والمحلات التجارية (ماعدا المطاعم والكافيهات) تكون مقفلة في ايام العطل (الاحد) واجازات الاعياد ..مثل الايستر وعيد العمال ..والخرابيط .
بالنسبة للملاهي :
توجد ملاهي جاردا لاند بالقرب من بحيرة جاردا الايطالية ..ملاهي جميلة ..وتقع بين فينيسيا وميلان .
توجد ملاهي الكوني لاند .بالقرب من زيورخ ..مثل ما تفضل العمدة القطري .
توجد ملاهي اليوروب بارك ..وتقدرون تروحون لها بالسيارة او بالباص (توجد رحلات من الصباح والعودة في المساء).
ومقارنة بالديزني …بصراحة مافي زي اليوروب بارك ..ثم جاردا ..ثم كوني .
اليوروب بارك من وجهة نظري المفروض تخصيص يومين عشان الواحد يشطب الالعاب اللي فيها..من كبرها لا اله الا الله
واذا نويتم زيارتها في يوم واحد ..اتمنى عدم الذهاب اليها ايام الاجازات السبت والاحد والعطل .
بالنسبة للجو :
فصل ذوبان الثلج ..من اجمل فصول الربيع …ويعتبر ابريل بدايته .
لألألأ ..الصفار تلقونه في الخريف .
بالنسبة للسيارة :
ما اعتقد ان الشنط الكبيرة تكفي في شنطة السيارة …يا دوب ثنتين والثالثة بحب الخشوم . عن تجربة …
هذا اذا كانت سيدان .
اما اذا كانت Estate ..فتكفي ان شاء الله .
زي هذه يعني :
بالنسبة للفنادق ..انصحك تشوفين موقع بوكنج .فيه جميع الخيارات والاسعار المتاحة.
ولا تنسو تذكرون عدد الاطفال + اعمارهم عند البحث .
وممكن ما تلقو الا غرفة لشخصين مع طفل بسرير اضافي ..يعني تاخذو غرفتين …وهكذا
