سافرت الشهر الماضي الى أسبانيا وكانت ولله الحمد سفره ناجحه وسعيده جدا لأسباب عده أولها تمكني من مشاركة فريقي الحبيب برشلونه بانتصاراته التاريخيه :8888: وثاني أسباب النجاح اعتمادي على المعلومات القيمه والدقيقه التي حصلت عليها من هذا الموقع الغالي.. وفي محاوله مني لرد الجميل للموقع وأعضاءه الكرام سأقوم بعرض تجربتي مع أستئجار السياره بأسبانيا يمكن احد يستفيد منها خاصه ان الصيف على الابواب.. وبيكون عرض التجربه من خلال 4 جوانب وهي :
- اجراءات حجز السياره .
- معلومات لازم الواحد ياخذها بالاعتبار أذا كان ناوي يستأجر سياره بأسبانيا.
- بعض مميزات وإيجابيات استئجار السياره بأسبانيا.
- سلبيات أستئجار السياره بأسبانيا .
وقبل ما ابدء أحب أوضح ان الموضوع مبني على تجربتي الشخصيه وهذي أول مره أستأجر سياره بأسبانيا يعني إللي عنده إضافه حياه الله بكل سرور ..علما ان تقريري سيكون مركز فقط على استئجار السياره يعني مافي صور ولا أي حديث عنة المواقع اللي زرتها لان التقارير اللي تناولت هذا الموضوع كثيره بالموقع وفيها الخير والبركه. .
_ حجزت السياره عن طريق الانترنت ونوعها audi a4 وقيمة الاجار لمدة أسبوع بحدود الـ1900ريال سعودي شامله التأمين الشامل ( بـ1450 بدون التامين الشامل) .. وهذا الموقع اللي استأجرت السياره منه وانا متاكد انه الارخص والاحسن http://www.avis.co.uk
_ بمجرد أتباع الخطوات المطلوبه اثناء اجراءات التأجير على الموقع تكون سهلت على نفسك ووفرت الكثير من الوقت حيث ان الموقع يطلب منك بالإضافه الى بطاقة الائتمان رقم رخصة القياده وكذلك رقم الرحله اللي بتوصل عليها وذلك لتسريع إنهاء إجراءاتك وهذا ما حصل معي تماماً حيث أستلمت سيارتي خلال أقل من 5 دقائق.
_ قارنت سعر الأجار من المحل نفسه مع الأنترنت طلع الفرق كبير طبعا الانترنت أوفر بكثير .
_ عن طريق الانترنت تقدر تختار فئة السياره اللي تبغاه وكل فئه تشمل 3 أو 4 سيارت .. اما عن طريق المحل فحسب المتوفر والاختيار ما راح يكون واسع مثل الانترنت .
_ كما أشرت الموقع يحجز لك سياره من الفئه المطلوبه يعني يمكن تلاقي السياره غير اللي انت حجزتها بس من نفس الفئه وهنا لازم تعرف انواع السيارات اللي موجوده بالفئه نفسها عشان ما تتفاجئ وبالطبع تقدر ترسل لهم إيميل تحدد فيه السياره اللي انت تبغاها اذا كان هذا الموضوع مهم جدا لك (انا حجزت BMW 318 وعطوني audi a4) يعني زي ماقلتكم نفس الفئه .
_ طبعا اذكر الجميع لازم تكون عندك رخصة قياده باللغه الانجليزيه.
انا كتبت هذي النقطه لان عندنا بالسعوديه الرخصه القديمه غير مترجمه اما الجديده خلاص صارت باللغتين العربيه والانجليزيه وطبعا تعتبر كافيه جدا واللي ما عنده رخصه عليها ترجمه يطلع رخصه دوليه واي وحده من الرخصتين كافيه وبصفه عامه الاسبان غير معقدين .
ثانيا : معلومات لازم الواحد ياخذها بالاعتبار أذا كان ناوي يستأجر سياره بأسبانيا :
_ تناسب حجم السياره مع عدد الركاب والشنط وهذا امر مهم .. (أنصح بتقليص حجم وعدد الشنط قدر الامكان لان السيارات هناك صغيره والسيارات الكبيره غاليه وقيادتها ماتنفع بأوروبا عامة ).
_ بالنسبه للتنقلات فلابد يكون مع السائق جهاز القارمن (gbs) ويكون السائق ملم بطريقة أستخدام هذا الجهاز جيدا لان الرحله بالسياره بكل تفاصيلها تعتمد على هذا الجهاز وصدقوني هذه النقطه مهمه جدا بدون أي مبالغه وللمعلوميه الشعب الاسباني قليل جدا منهم يتحدث الانجليزيه يعني لا أحد يتوقع أنه بيلاقي مساعده من ناحية توصيف مكان أو طريق ( للمعلوميه 5 دقايق كافيه لإتقان استخدام القارمن ) واللي ما عنده أستعداد يتعلم ويستخدم هذا الجهاز انصحه بعدم أستئجار سياره لانها بتكون صعبه.
_ اقترح على أي شخص ناوي يستأجر سياره أن يراجع حجز الفندق ويتأكد ان الفندق يوفر مواقف سيارات أو لأ لان المواقف غاليه جدا هناك .
_ لازم تكون السياره ديزل لان اسعار الوقود غاليه جدا ( انا دفعت قيمة الديزل والخزان فاضي تماماً 58 يورو ) بس هذه المره الوحيده وكانت بأخر يوم قبل ما أسلم السياره يعني الديزل مشاني لمدة أسبوع ولاكثر من 1100 كيلو متر..(معظم السيارات هناك ديزل بس تأكد من هالمعلومه اثناء حجز أو استلام السياره )
